Shillong, Naitung 23
U nongïalam ka Liang Pyrshah ha Ïingdorbar Thawaiñ ka Jylla, u Bah Ronnie V Lyngdoh u la kynthoh ïa ka jingkam jong ka Sorkar NDA ha ka mang tyngka jong ka ri na bynta u snem 2024-2025 ba ka la lah ban tehlakam ïa ka jingkiewdor hynrei ha madan ka long da kumwei.
U Bah Ronnie uba dei u MLA ka Congress na Mylliem u la pynpaw ïa kane haba kynthoh halor ka mang tyngka jong ka ri na ka bynta u snem 2024-2025 kaba wanrah da ka Nirmala Sitharaman ka Myntri kaba peit ïa ka tnat pla tyngka ka Sorkar Pdeng.
Haba ai jingkynthoh halor ka mang tyngka jong ka ri, u Bah Ronnie u la ong ba ka jingkhmih lynti ka long ban kham duna ka jingkyrduh kam ki samla ha ka ri bad ban shim ki lad ki lynti ban tehlakam ïa ka jingkiewdor kaba ktah ïa ki rit ki ria bad kiba duna ka ïoh ka kot.
Ka Sitharaman ka ong ba ka jingkiewdor ka neh bad ka long kumba 4 percent.
“Ka Sorkar Pdeng ka ong ba ka jingkiewdor ha ka ri ka long ka neh bad kam kiew hynrei ha madan pat ka long da kumwei namar ki mar ki mata naduh ki mar bam ki la kiewdor shaba palat bad kata ïa kiba duna ka ïoh ka kot bad kam don satia ka jingtehlakam.
U la ong ba la khmih lynti ba ka Sorkar Pdeng kan don ruh ka jingpyrkhat ïa ki kynthei kiba trei bylla kynthup kito kiba trei bylla hapoh ka skhim MGNREGS, hynrei kam don satia ka jingpynkiew ïa ka bai bylla sngi jong kito kiba trei bylla hapoh kane ka skhim.
Ha ka mang tyngka u snem 2024-25, ka Sorkar Pdeng ka la mang T.86,000 klur, katba ha u snem 2023-24, ka jinglut na ka bynta kane ka skhim kynthup ka pisa kaba pynsahteng ban pyllait sha ki Jylla katkum ka website jong ka tnat Rural Development ka long T.1.2 lak klur.
“Ngi kwah la kumno-kumno ka bai bylla hapoh ka skhim MGNREGS kan kiew sha ka T.400 shisngi, hynrei ka Sorkar Pdeng kam shym la pyni ha ka mang tyngka ban pynkiew ïa ka bai bylla. Lada kiew ka bai bylla ka ïoh ka kot ka kham biang bad ka pisa ruh ka ïaid namar ngi ïoh ban thied ban siew. Haba ka jingkiewdor ka la nang kiew shuh shuh kumno kin ong ba ka jingkiewdor ka don hapdeng ka jingtehlakam,” la kynthoh u Bah Ronnie.
