New Delhi, Naitung 23
Ka Myntri ka tnat Pla Tyngka ka Sorkar Pdeng, ka Nirmala Sitharaman, haba wanrah ïa ka Mang Tyngka ha ka Sngi Ba-Ar ha Lok Sabha, ka la ong ba ka Sorkar Pdeng kan ai T. 26,000 klur ïa ka jylla Bihar ban shna surok bad T. 15,000 klur ïa ka jylla Andhra Pradesh na ka bynta ki kam pynroi.
Katei ka T. 26,000 klur ka dei na ka bynta kiba bun ki surok ha Bihar kum ka Patna-Purnea Expressway, Buxar-Bhagalpur Expressway, Bodhgaya, Rajgir, Vaishali bad Darbhanga, bad ka jingkieng 2-lane halor ka wah Ganga ha Buxar. Nalorkata, yn ai pisa ruh ban shna ïa ki projek bording kum ka power projek ba 240 MW ha Pirpainti ha ka jinglut kaba T. 21,400 klur. Nalorkata, yn shna ïa ki kad liengsuiñ bathymmai, shlem pule doktor bad ki shlem ai jinghikai ïa ki nongïalehkai ha Bihar.
Ha kaba ïadei bad ka Andhra Pradesh, ka Sitharaman ka la ong ba hapoh ka Andhra Pradesh Reorganization Act, ka Sorkar Pdeng kan ai T. 15,000 klur mynta u snem. Ka la ong ba kane ka jylla ka donkam ïa ka nongbah.
Ka la ong ruh ba ka Sorkar Pdeng ka long kaba kut jingmut ban pyndep kham kloi ïa ka Polavaram Irrigation Project, kaba long u budlum na ka bynta ka Andhra Pradesh bad ki nongrep jong ka.
Hapoh katei ka Act, yn ai ruh ïa ka jingïarap ban shna ïa ki rel, surok, bording bad ban pynpoi um ha ka thaiñ Kopparthy kaba dei shi bynta na ka Vishakhapatnam-Chennai Industrial Corridor bad ka thaiñ Orvakal kaba don ha ka Hyderabad-Bengaluru Industrial Corridor. Ka Myntri ka la ong ruh ba yn ai pisa shuh mynta u snem sha ka Andhra Pradesh na ka bynta ban shna ïa ki jingtei khnang ba kan kiew ha ka ïoh ka kot.
Shuh shuh ka Sitharaman ka la ong ba ka Sorkar Pdeng kan wanrah ïa ka saiñdur bathymmai ba la tip kum ka ‘Purvodaya’ na ka bynta ban pynkiew shaphrang ïa ka Bihar, Jharkhand, West Bengal, Odisha, bad Andhra Pradesh.
Lah ban kdew ba ki seng kiba ïalam ïa ka sorkar ha Bihar bad Andhra Pradesh, kata, ka Janata Dal (United) jong u Nitish Kumar, bad ka Telugu Desam Party (TDP) jong u N Chandrababu Naidu, ki don mar 12 bad 16 ngut ki MP ha Lok Sabha.
Ka jingkyrshan jong kine ki artylli ki seng ïa ka BJP ha Lok Sabha ka long kaba donkam palat na ka bynta u Narendra Modi khamtam hadien ba ka BJP ka la jop 240 ngut ki MP nalade.
Namarkata, ka jingai ïa kitei ki song jingïarap sha Bihar bad Andhra Pradesh, katkum ki nongpeit pyrman, ka long ban pynthikna ba ka JD (U) bad ka TDP kin ym kynriah na ka kynhun National Democratic Alliance (NDA) bad kin ïai kyrshan beit ïa ka BJP haduh ba kut ka samoi jong ka sorkar ba la ïalam da u Modi.
