Ka Mang Tyngka bapura jong u snem 2024-25 ba la wanrah da ka Myntri ka tnat Pla Tyngka ka Sorkar Pdeng, ka Nirmala Sitharaman, ha ka Sngi Ba-Ar ha Lok Sabha, ka pyni ïa ka jingkhlaiñ jong ki artylli ki seng saiñpyrthei, kata, ka Janata Dal (United) na Bihar bad ka Telugu Desam Party (TDP) na Andhra Pradesh. Kane ka long namarba ha ka Mang Tyngka, la pynbna ba ka Sorkar Pdeng kan ai T. 26,000 klur ïa ka jylla Bihar ban shna surok bad T. 15,000 klur ïa ka jylla Andhra Pradesh na ka bynta ki kam pynroi. Katei ka T. 26,000 klur ka dei na ka bynta kiba bun ki surok ha Bihar kum ka Patna-Purnea Expressway, Buxar-Bhagalpur Expressway, Bodhgaya, Rajgir, Vaishali bad Darbhanga, bad ka jingkieng 2-lane halor ka wah Ganga ha Buxar. Nalorkata, yn ai pisa ruh ban shna ïa ki projek bording kum ka power projek ba 240 MW ha Pirpainti ha ka jinglut kaba T. 21,400 klur. Nalorkata, yn shna ïa ki kad liengsuiñ bathymmai, shlem pule doktor bad ki shlem ai jinghikai ïa ki nongïalehkai ha Bihar.
Ha kaba ïadei bad ka Andhra Pradesh, ka Sitharaman ka la ong ba hapoh ka Andhra Pradesh Reorganization Act, ka Sorkar Pdeng kan ai T. 15,000 klur mynta u snem. Ka la ong ba kane ka jylla ka donkam ïa ka nongbah. Ka la ong ruh ba ka Sorkar Pdeng ka long kaba kut jingmut ban pyndep kham kloi ïa ka Polavaram Irrigation Project, kaba long u budlum na ka bynta ka Andhra Pradesh bad ki nongrep jong ka. Hapoh katei ka Act, yn ai ruh ïa ka jingïarap ban shna ïa ki rel, surok, bording bad ban pynpoi um ha ka thaiñ Kopparthy kaba dei shi bynta na ka Vishakhapatnam-Chennai Industrial Corridor bad ka thaiñ Orvakal kaba don ha ka Hyderabad-Bengaluru Industrial Corridor. Ka Myntri ka la ong ruh ba yn ai pisa shuh mynta u snem sha ka Andhra Pradesh na ka bynta ban shna ïa ki jingtei khnang ba kan kiew ha ka ïoh ka kot. Shuh shuh ka Sitharaman ka la ong ba ka Sorkar Pdeng kan wanrah ïa ka saiñdur bathymmai ba la tip kum ka ‘Purvodaya’ ban pynkiew shaphrang ïa ka Bihar, Jharkhand, West Bengal, Odisha, bad Andhra Pradesh.
Ki seng kiba ïalam ïa ka sorkar ha Bihar bad Andhra Pradesh, kata, ka Janata Dal (United) jong u Nitish Kumar, bad ka Telugu Desam Party (TDP) jong u N Chandrababu Naidu, ki don mar 12 bad 16 ngut ki MP ha Lok Sabha. Ka jingkyrshan jong kine ki artylli ki seng ïa ka BJP ha Lok Sabha ka long kaba donkam palat na ka bynta u Narendra Modi khamtam hadien ba ka BJP ka la jop 240 ngut ki MP nalade. Namarkata, ka BJP kam banse ban hap bat beit ïa kine ki artylli ki seng da kaba theh pisa da ki hajar klur tyngka sha Andhra Pradesh bad Bihar. Lada kine ki artylli ki seng ki weng noh ïa ka jingai jingkyrshan ïa ka sorkar BJP, u Modi u lah ban don hapdeng ka jingma. Lada kine ki seng ki leit ai jingkyrshan noh ïa ka INDIA Bloc, khlem pep kan don ka jingkhih bashyrkhei ha ka saiñ hima sima jong ka Ri, bad ka lah ban poi ka por ba yn synshar da ka sorkar bathymmai.
Hynrei katei ka jingleh jong ka BJP kan nang pynbitar ïa kiwei pat ki jylla kiba khlem ïoh ïa kano-kano ka song jingïarap bakyrpang. Lada long ban ai ïa ka Andhra Pradesh bad Bihar, balei ym long ban ai lem sha Meghalaya ne Manipur? Hato donkam kam pynroi tang kine ki artylli ki jylla kiba ka BJP ka donkam ïa ki seng saiñpyrthei jong ki khnang ban neh ka sorkar? Kumno yn shu ai lut tang sha kine ki artylli haba baroh ki nongshong shnong ki ïa siew khajna lang? Hato ïa ka Goods and Services Tax (GST) kaba wanrah khajna ïa ki jylla bad ïa ka Sorkar Pdeng la siew tang da kine ki artylli ki jylla? Kane ka jingleh shiliang khmat kan ym wanrah ïa ka jingbha, hynrei kan nang pynbitar shuh-shuh ïa ki paidbah nongshong shnong pyrshah ïa ka BJP. Ka la dei ka por ïa kiwei pat ki jylla ban ïatreilang bad ban leit dawa ïa ka song jingïarap kaba kumjuh na ka Sorkar Pdeng. Ki dei ruh ban ïakhih da kaba tyngeh ha ki jylla lajong bad ha Delhi tad haduh ba ka Sorkar Pdeng kan pynurlong ïa ki jingdawa jong ki.
Kane ka jingpynkylla saiñpyrthei ïa ki kam pynroi kam long kaba bha. Baroh ki nongshong shnong ki don ka hok ban ïoh lem ïa ka bhah ka bynta. Ngim kwah ba ka Sorkar Pdeng kan knieh noh ïa ka bhah ba ka la dep ban mang na ka bynta ka Andhra Pradesh bad Bihar, hynrei ka dei ban ai lem ruh sha kiwei ki jylla kumba ai ïa kine ki artylli. Lada ma ki ki don hok ban ïoh, ma ngi kiba shong ha Meghalaya ruh ngi don ka hok ban pan. Ha ki snem ba mynshwa, ngim ju ïohsngew ïa ka Sorkar Pdeng ba kan da pynbna syndon ha ka Mang Tyngka da ka song jingïarap bakyrpang ïa ki jylla lait noh sa tang ha ki khep ba ki shah lynshop ha ki bor mariang bad ka jinglynshop ruh ka long kaba la jubor. U Modi u la sdang ïa kane ka jingpynkylla saiñpyrthei ïa ka Mang Tyngka. Ki sorkar ki ban wan hadien ki lah ban leh kumjuh ha kaba kiwei kin ïoh pahuh bad kiwei kin hap ban peit jawdud. Namarkata, ki seng saiñpyrthei kiba shong ha ka liang pyrshah bad kiwei ruh ki dei ban ïasnohkti ban dawa ban ai bhah lang ïa baroh ki jylla kiba don ha ka Ri khlem da leh shiliang khmat ïano-ïano.
