Shillong, Naitung 23
Ka jingkhmih lynti ba ka Sorkar Pdeng kan wanrah ha kane ka Dorbar Lyiur ïa ka aiñ ban pynkylla ïa ka Khyrnit Hynriew (Sixth Schedule) kam donlad shuh namarba ka Sorkar Pdeng ka la dep buh lypa ïa ki Bill ha ka thup ban wanrah ha Ïingdorbar Lok Sabha.
Ka Amendment Bill halor ka Khyrnit Hynriew kam shym la paw satia ha ka thup jong ki Bill kiba la pynmih da ka Lok Sabha Secretariat ban wanrah ha kane ka Dorbar Lyiur jong ka Parliament kaba long naduh 22 tarik Naitung haduh 12 tarik Nailar.
Ki Bill kiba dei ban wanrah ha Parliament ki kynthup, The Finance (No. 2) Bill, 2024, The Disaster Management (Amendment) Bill, 2024, Boilers Bill, 2024, The Bhartiya Vayuyan Vidheyak, 2024, The Coffee (Promotion and Development) Bill, 2024, The Rubber (Promotion and Development) Bill, 2024.
Ïa kine ki Bill la dep pynrung lypa hashwa ban sdang ka Dorbar Lyiur jong ka Parliament.
Ha kawei pat ka liang, ki Chief Executive Member (CEM) jong ki Autonomous Council na ka Thaiñ Shatei Lam Mihngi kiba dei ban ïakynduh ïa u Myntri korbar ri u Amit Shah ha ka Sngi Ba-ar kim shym la ïoh shuh ban ïakynduh namar ka jingbunkam jong u, bad kane ka jingïakynduh kan long noh ha ka Sngi Balang ha Delhi.
U CEM ka KHADC, u Bah Pynïaid Sing Syiem u la her kyrkieh na Shillong sha Delhi ban ïoh ïakynduh ha ka Sngi Balang, hadien ba ka jingïakut jong ka kynhun ki CEM ban ïakynduh ïa u Amit Shah ha ka Sngi Ba-ar kam shym la urlong.
