![Yn pynmih ïa ka jingpynrung kyrteng na ka bynta ka ilekshon shiteng samoi ha ka 8 tarik, Nailar thep-vote](https://unongsainhima.com/wp-content/uploads/2024/07/thep-vote-720x405.jpg)
Guwahati, Naitung:
U Chief Electoral Officer jong ka Assam u Anurag Goel, u la pynbna ba ïa ka jingpynrung kyrteng kaba khatduh na ka bynta ka ilekshon shiteng samoi ha ki san tylli ki Assembly konstitwensi yn sa pynmih ha ka 8 tarik, Nailar.
Ha ka jingïalang bad ki nongthoh khubor kaba la long ha ka sngi Thohdieng jong ka taïew ba la lah, u Goel u la batai bniah ïa ka por bad ki jingpynkhreh na ka bynta kane ka ilekshon shiteng samoi, ïa kaba la buh ban long ha ka konstitwensi Dholai (SC), Sidli (ST), Bongaigaon, Behali, bad Samaguri.
Kine ki konstitwensi ki la sah thylli hadien ba la jied ïa ki MLA jong ki sha ka Lok Sabha.
U Goel u la ban jur da kaba ong ba ka Election Commission ka la sdang ïa ka kam pynkhreh na ka bynta ka ilekshon shiteng samoi, kaba dei ban pynlong hapoh hynriew bnai hadien ba la mih ka jingpynbna ïa ki nongjop kiba ïakhun ïa ka ilekshon Lok Sabha.
U la pynshai ruh da kaba ong ba ïa ka ilekshon yn pynlong da kaba pynshong nongrim ïa ka jinglong jingman jong kine ki konstitwensi shwa ka jingbuh bad pynbiang ïa ki pud ki sam jong ki konstitwensi.
Ka ilekshon Lok Sabha kaba dang shen ka dei kaba nyngkong eh kaba la long hadien ba ki la don ki kynrum kynram halor ka jingpynbeit pud katkum ki konstitwensi ha Assam, ïa kaba la kynthoh jur da ki seng ka liang pyrshah naba la ong ba ka la don ka jingleh shiliang khmat jong ka seng BJP kaba bat ïa ka jingsynshar.
Ka Electionn Department ka la don jingthmu na ka bynta ban ïasam ïa ki jingpynrung kyrteng jong ki konstitwensi bad ki seng saiñ pyrthei kiba la shah ithuh ha ka sngi Saitjaiñ kata ha ka 27 tarik, Naitung.
Ïa ka jingbuh kyrteng kaba hashwa yn sa pynmih ha ka 30 tarik, Naitung, bad ïa ki jingdawa bad jingpyrshah yn pdiang haduh ka 10 tarik u Nailar.
Namar ki jingpyntrekam bad ki jingpynbna ba dang shen na ka bynta ka ilekshon Lok Sabha, ha kane ka por ïa ki jingdawa bad jingpyrshah yn pyntreikam da ka Offline.
Hadien ka jingpynshai halor ki jingdawa bad ki jingpyrshah haduh ka 19 tarik u Nailar, ïa ka bynta kaba khatduh jong ka jingpynrung kyrteng la buh ban pynmih ha ka 20 tarik Nailar, la ong u Goel.