Shillong, Naitung 24
Ki pulit pynïaid kali jong ka East Khasi Hills, haduh kane ka sngi ki la ïoh ban tar noh ïa ki ïit ïong ryngkat ka daiñ kuna ïa kumba 109 tylli ki kali kiba la tah ïit ïong.
Kane ka jingkhynra jong ki pulit pynïaid kali hapoh ka district ka la long hadien ba na ka liang u Superintendent of Police (SP) ka EKH u la pynmih da ka jingmana bad maham ha ka 22 tarik mynta u bnai.
U SP ka East Khasi Hills u Bah S Nongtnger u la pyntip ba ki pulit ka district ki la pynlong ka jingtar ïa ki jingtah ïit ïong ha ki ïit jong ki kali hapoh ka district kum ka jingpyrshang ban wanrah ïa ka jingshngaiñ bad khanglad ïa ki kam bymman.
U SP u la ong ruh ba katkum ka Motor Vehicle Act bad haba pyntreikam ïa ka hukum ka ïingbishar Supreme Court, ka jingtah ïit ïong ka dei kaba la khang pyrshah bad kiba ïaleh pyrshah kin ngat ha ki jingpynsaja. Shuh shuh u la kyntu ïa ki trai kali ba kin bud ïa ki kyndon aiñ bad weng lut noh ïa baroh ki jingtah ïit ïong ha ki ïit kali.
