Tura, Naitung 24
Kawei ka longïing kaba don saw ngut ki dkhot ha ka shnong Sathegre kaba hap ha thanat Dadenggre ha West Garo Hills, ka la shah beh na ka ïing sah jong ki ha ki para marjan hadien ba la kynnoh ‘ai-ksuid’.
Ki jingkynnoh ‘ai-ksuid’ ki mih na ka por sha ka por ha ka thaiñ Dadenggre, bad kawei na ki jingjia bashyrkhei tam ka long ha Mrigre kaba don hajan Rongram kumba katto katne snem mynshwa ha kaba san ngut ki dkhot na kajuh ka ïing ki la shah pynïap ha ki nongshong shnong.
Katei ka longïing ka kynthup ïa u kpa, ka kmie bad ar ngut ki khun kynthei kiba dang pule ha ka Class XII bad Class V.
Katei ka jingshah beh ka la jia ha u bnai Nohprah 2023 hadien ba ki para marjan jong katei ka longïing ki la wan ban tohkit halor ka jingsuba ba katei ka longïing ka dei kaba ‘ai-ksuid’. Ha kato ka por, ki la shah beh na la ïing hapdeng jong ka miet bad ki nongshong shnong ki khlem ailad ïa ki dkhot jong katei ka ïing ba kin rah wat tang ki tiar bakongsan lane pisa.
Ha kine ki hynñiew bnai, katei ka longïing ka la shong la sah ha ka shnong Chiading bad ka la kamai jakpoh da kaba trei bylla. Ka jingpule jong kitei ki arngut ki khynnah kynthei ka la shah ktah jur namar jong ka jingshah beh shnong.
Da ka jingpyrkhat ba ki nongshong shnong ki la klet bad ki la map ïa ki, katei ka longïing longsem ka la leit phai sha shnong Sathegre. Hynrei ki nongshong shnong kiba la don ka jingsuba sniew ki la wan ha ka 14 tarik Naitung bad ki la beh biang ïa kitei ki saw ngut.
Na ka liang katei ka longïing longsem, kaba la mad jingeh shikatdei, ka la leit ïakynduh ïa kawei ka nongtrei mon sngewbha ïa kaba la tip kyrteng kum ka Jaynie N Sangma, bad ki la pan jingïarap na ka.
“Ka long kaei-kaei kaba sngewsangsot namar ki khlem don wat tang ka bam. Ki la ong ïa nga ba ha kaba ïadei bad katei ka jingjia, ki la leit ïathuh ha ki pulit kiba don ha thanat Dadenggre, hynrei ym shym la don ba shimkhia ïa kane,” la ong ka Jaynie.
Ka la ong ruh ba katei ka longïing kam don eiei shuh mynta wat la ha la shnong, ki don ïa ki jingthung jingtep kum u kwai, sohmrit, jingri. Hynrei mynta, ym don shuh ki ban peit ne sumar ïa kita ki jingthung bad ki jingri, ka la bynrap.
Nalorkata, ka la ïathuh ba katei ka longïing ka la pyrshang ban buh ïa ki jingri ha ka ïing ka sem jong kawei na ki bahaïing jong ki kaba sah ha kajuh ka shnong. Hynrei kita ki nongshong shnong ki la byrngem ba kin ‘tait shnong ïa ka ruh. Namarkata, ki la hap shu ieh noh kumto ïa ki jingri, ka la ong.
Haba ki la poi ha ka ïing jong ka Jaynie, la ïalam ïa katei ka longïing sha thanat Tura ban pan jingïarap.
Hadien ba u la ïoh jingtip halor katei ka jingjia, u SP ka West Garo Hills, u Abraham T Sangma, u la shimkhia bad la ai ïa ka FIR ha ka 22 tarik Naitung ha Tura ha shwa ban pynkynriah ïa ka FIR sha Dadenggre. Na ka liang u SP u la ong ba u SDPO ka Dadenggre un khlieh ïa ka jingtohkit halor katei ka jingjia.
Ha kawei pat ka liang, la ong ba ka la don ka jingkyrpad sha ki dkhot jong ka Kur ba kin tuklar lem halor katei ka jingjia khnang ba katei ka longïing longsem ka lah ban leit phai sha la shnong bad ba kitei ar ngut ki khynnah kin ïoh ban bteng biang ïa ki jingpule jong ki.
