Shillong, Naitung 24
Ka kynhun ki nongtrei nurse jong ka jylla ha ka Sngi Balang ba ki leit ban ïakynduh ïa ka Myntri tnat ka koit ka khiah, ka Kong Ampareen Lyngdoh ki la aiti ïa ka dorkhas haba ïadei bad ka jingthungkam kontrak ïa ki nurse hapoh ka Jylla.
Ha kane dorkhas ki nongtrei nurse ki la dawa ban pyndam noh ïa ka jingpynbna (Advertisement) ban khot thep kam da kaba kynnoh ba ka lah ban don ka jingbym leh khuid ha ka por pynlong eksamin.
Ha ka jingïakren bad u samla Lurstep Nongrum, u la ong ba ki dawa ba dei ban pynlong ïa ka jingthep kam bapura (Permanent) ïa ki nurse khnang ban pynthikna ba ka kam ba ki trei kan long kaba skhem na ka bynta baroh kiba ïoh ïa ka kam.
“Ngi dawa ba dei ban thep kam katkum ka jinglah (Merit) ki nongthep kam bad ban pynthikna ba tang kiba dei hok ban ïoh ki dei ban shah thungkam” la ong u samla Lurstep.
Nalor kane, u la ïathuh ba la dawa ba dei ban pynthikna ba ka rukom pynlong eksamin ka dei ban long kaba khuid bad suba da kaba pynbiang ki bor pahara ha ka por thoh eksamin bad ruh ba dei ban pynbna paidbah ïa ki kyrteng jong kiba ïoh bad bym ïoh ïa ka kam ha ryngkat ki Marks ba ki samla thep kam ki ïoh ha ka eksamin ban pynthikna ba ka rukom thep kam ka long kaba khuid bad suba.
Kumta na ka liang u samla Lurstep u la kyntu ïa ka Myntri ka tnat ka koit ka khiah ban pynsted ha ka ban pynbna ïa ka resol.
U la ong ba ki nurse ki la dawa na ka Myntri ka tnat ka koit ka khiah ban pynjlan ïa ka rta bad ha kajuh ka por ban pynphai biang ïa ka pisa jong kito kiba thep kam ha ka por khot thep kam kontrak.
