Jowai, Naitung 24
Uwei u samla ïa uba la tip kyrteng kum u Ribun Phawa u la duh ei ïa la ka jingim na ka daw ka jingïap op hadien ba u la hap hapoh ka pung um kaba jylliew katba ar ngut kiwei pat ki la lait im.
Kane ka jingjia ka la jia ha Khliehrymphum, Ladthadlaboh hajan jong ka Polytechnic Jowai ha ka por kumba 5 baje janmiet ha ka 24 tarik Naitung.
Haba ïakren bad u Superintendent of Police ka West Jaiñtia Hills District, u la ïathuh ba la don ar ngut ki nongtrei u Sbor Shylla bad u Freddie Shylla ki dang pynkhuid ïa ka pung um kaba jylliew kumba 40 phut bad ki la hap hapoh katei ka pung um na ka daw ka jingsma jong ka lyer bih kaba mih na ka pump um kaba ki pyndonkam.
U la ïathuh ba ki nongshong shnong mar-mar ki la wan ban ai jingïarap ïa kine ar ngut bad lah ban sei ïa ki ha ka jingbymtip briew shuh. Hadien kane la pynkit noh ïa ki sha hospital, bad mynta ki la sdang ban kyndit bynriew. Hynrei u Ribun Phawa uba la wan ban ïarap sei ïa kine a rngut na katei ka pung um, u la hap pynban ïa lade shapoh kane ka pung na kajuh ka daw ka jingbym lah ring mynsiem.
Kine baroh lai ngut ki dei na ka shnong Sabah Muswang, West Jaiñtia Hills District.
Ki pulit ha ryngkat ki pulit ka tnat pynlip ding ki la lah ban khwai noh ïa ka met jong u ha ka por kumba 8 baje janmiet ha kaba la shem ba u la khlad noh, la ong u SP.
