Jowai, Naitung 24
Ka Mookynphad Mihmyntdu, ka Myrjai bad Pasyih Cultural ki la khur ïa ka jingjop ha ka lympung ïalehkai 4th Adelbert Laloo Memorial Trophy-3rd Division Tournament ba la pynïaid da ka West Jaiñtia District Sports Association (WJDSA) ha ka sngi Balang ha Kiang Nangbah Stadium kaba ha Jowai.
Ha kane ka jingïakhun, ka Myrjai ka la pynjem khnap ïa ka Umchangiar haduh shiteng dorjon (6-0 kol). U Elast Dkhar u la khur ïa ka hat-trick da kaba thep marwei haduh saw kol kata ha ka minit kaba 7, 10, 57 & 62, katba ïa kiwei pat la thep da u Ngaitlang Lamare ha ka minit kaba 22 bad u Sperbha Syntem ha ka minit kaba 33.
Ha ka jingïalehkai kaba bud, ka Mookynphad Mihmyntdu ka la pynliem noh ïa ka Youth Welfare Pynthor da 1-0 kol bad ïa kane la thep da u Wailad Shylla ha ka minit kaba 22.
Ka Pasyih Cultural ka la pynliem ïa ka West Madan Mustem da 2-1 kol. Watla ka West Madan Mustem ka la ïoh ban pynkhih jar nyngkong eh lyngba u Zumi Tariang ha ka minit kaba 22, hynrei ki rangïalehkai ka Pasyih Cultural ki la ïakhun tyngeh na ka bynta ban pynphai kylla haduh ar kol lyngba u Deiwi Rymbai ha ka minit kaba 54 bad u Phem Dkhar ha ka minit kaba 70+1.
Haba phai sha kawei pat ka jingïakhun kaba la long hapdeng ka Ïooksi Welfare pyrshah ïa ka Pynthor Langtein ki la ïasam mar shi point hadien ba ki la ïakhaid mar 1-1 kol. Ka Iooksi Welfare ka la pynkhih jar nyngkong lyngba u Reshan Paslien ha ka minit kaba 5, hynrei ka Pynthor Langtein ka la pynphai kylla lyngba u Sniawhun Suting ha ka minit kaba 7.
