Nongpoh, Naitung 24
Ki pulit ka Ri-Bhoi ha ka step jong ka Sngi Balang ki la ïoh ban kurup 236.89 kilo u Kynja (Ganja) na ki kali kiba la wan na Tripura bad ki la ïoh ban kem ïa uwei hadien ka jingbeh thong katba arngut ki la lait phet.
Ha u kyrwoh khubor, u SP ka Ri-Bhoi, u Jagpal Singh Dhanoa, u la ong ba hadien ba la ïoh jingtip, ki pulit na Umroi PIC ryngkat bad ki pulit ka Anti-Narcotics Task Force ki la pynlong ïa ka jingkhynra kali ha Lumdiengngan ha ka por kumba 3:05 mynstep.
Ha kane ka jingkhynra, ki la ïoh pynsangeh ïa artylli ki kali Pick-up kiba don ïa u nombor TR 05/F-1909 bad TR 04/D-1920. Hynrei ha ka por ba ki pulit ki dang pynlong ïa ka jingpeit bniah, kawei na ki kali kaba don ïa u nombor TR 05/F-1909 ka la phet krad sha ka thaiñ Bhoirymbong katba kawei pat kaba don ïa u nombor TR 04/D-1920 ka la phet sha ka thaiñ Umeit.
U SP u la ong ba ki pulit ki la beh thong ïa kitei ki kali, bad hadien katto katne por, ki la lap ïa baroh ar. Hynrei u nongñiah bad u nongbud jong ka kali kaba don ïa u nombor TR 05/F-1909 ki la lait phet da kaba shim kabu na ka jingdum jong ka miet bad ka jingdon ki jaka khlaw katba ki la ïoh kem pat ïa u nongñiah ka kali TR 04/D-1920.
Ïa une u nongñiah la tip kyrteng kum u Supan Chakma, 25 snem ka rta, na ka shnong Nalkata, West Tripura.
Na kitei ki kali, ki pulit ki la kurup ïa u Kynja uba don haduh 236.89 kilo. Nalorkata, ki pulit ki la kurup ïa kitei ki kali Pick-up bad kawei ka Mobile Phone.
