Guwahati, Naitung:
Ka dorbar mang tyngka ba dang shen ba la wanrah da ka Myntri ka tnat pla tyngka ka Nirmala Sitharaman ka la shah kynthoh jur na ki seng ka liang pyrshah, ha kaba na ka liang u MP ka seng Congress u Gaurav Gogoi u la kynnoh pyrshah ba kane ka mang tyngka ka long ka “bym hok”.
Kum shi bynta ban pynpaw ïa ka jingsngewsih halor kane, u Gogoi, u la ong, “Ka dei ka mang tyngka ka bym hok shisha. Kiba bun ki ki jylla jong ka India bad ïa kiba bun ki jingeh ba ki ïakynduh la iehnoh beiñ.”
“Kane ka dei ka mang tyngka ba duh jingkyrmen ba la wanrah da ka sorkar kaba duh jingkyrmen tang ban ïada ne ban pynneh ïa ka jingdon jong ka. Kim pyrkhat ïa kaei ba ki paidbah jong baroh ki jylla ki donkam,” u la bynrap.
