Shillong, Naitung 24
Ka khubor ba la ïohlum lyngba ka ‘website’ ki pulit ka jylla ha ka Sngi Balang ka ïathuh ba uwei u nongshong shnong ka Shillong u la ujor ba u la duh ei T. 10 lak ha ki ‘riew shukor.
Katkum ka jingujor, utei u nongshong shnong u la ong ba ha ka 19 tarik Naitung ha ka por kumba 4 baje janmiet, u la ïoh pdiang ïa kawei ka ‘phone call’ na u nombor uba um tip satia, bad ynda la ïakren, uta u briew u la pyntip ha u nongshong shnong ba ka don kawei ka song be-aiñ kaba dei ha ka kyrteng jong u (nongshong shnong).
Hadien kata, la ong ong ba uta u briew u la pynbor ïa utei u nongshong shnong ba un shim ïa kata ka ram kaba T. 10 lak khnang ba yn lah ban pyllait ïa katei ka song. La bthah ruh ba ïa kane ka T. 10 lak dei ban phah lyngba ki ‘Account’ bapher-bapher. Uta u nongujor u la sngap ïa kata ka jingbthah, hynrei hadien katto katne por, u la sngewthuh ba u la shah thok.
Ha kawei pat ka jingjia, ka Rimpa Ghosh ka la ujor ba ha ka miet jong ka 21-22 tarik Naitung, ki runar ki la prong ïa ka dukan die marbam jong ka ha Lumsohkynphor, Polo Hills, Shillong bad ki la tuh ïa ki marbam kiba shongdor T. 39,080. Shuh shuh ki pulit ki la ïathuh ba u Anshit Kakkar u la ujor ba ha ka 19 tarik Naitung, ki runar ki la tuh ïa ki sainar bad ‘cable’ kiba shongdor kumba T. 44,800 na ïew Polo. Nalorkata, ki pulit ki la ong ba u Prakash Pradhan u la ujor ba ha ka 21 tarik Naitung, ki runar ki la tuh ïa ka thuk-thuk jong u (AS-01EP-2408) najan ka Dam Umtru ha Ri-Bhoi.
Ha kawei pat ka jingjia ha ka 22 tarik Naitung ha ka por kumba 4:30 janmiet, uwei u runar u la shoh la dat ïa uwei u briew u bym don ïing don sem ïa uba la tip kyrteng kum u Subash Malakar ha Sawlad Madanrting, Shillong. Na kane ka jingshah shoh, une u briew u la mynsaw malu-mala bad la kit ïa u sha Civil Hospital, Shillong. Kham hadien la pynkynriah noh ïa u sha Lawmali Shelter Home, Shillong.
