Shillong, Naitung 24
Ka Voice of the People Party (VPP) ka la pynpaw ka jingpyrshah haba ïadei bad ka jingaiti ïa ka jaka jong ka Soil & Water Conservation bad ka tnad ka rep ka riang sha ka Invest Meghalaya Authority (IMA) na bynta ban pynïeng ïa ka Industrial Estate bathymmai ha Byrnihat, Ri-Bhoi District.
“Na ka liang ka seng ngi kwah ban pynpaw ka jingpyrshah jur ïa ka jingtyrwa kaba la ïakren ha ka jingïalang hapoh ka jingpynïaid u Myntri Rangbah ka Jylla ha ka 3 tarik Jymmang mynta u snem haba ïadei bad ka jingpyndonkam ïa ki jaka Sorkar na bynta ban thaw ïa ka Industrial Estate bathymmai ha Byrnihat, Ri Bhoi District,” la ong u President ka VPP, Bah Ardent M. Basaïawmoit ha ka shithi sha u Myntri Rangbah ka Jylla, u Conrad K. Sangma.
Kane ka dei halor ka jaka kaba 107 akar kaba dei jong ka tnad Soil & Water Conservation – ïa mynta kaba pyndonkam kum ka Conservation Training Institute, bad kawei pat kaba 27 akar jong ka tnad ka rep ka riang .
“Ngi im ha ka juk ha kaba ka jingkylla suiñ bneng ka long ka mat kaba hakhmat eh ha kylleng ka pyrthei. Ka jingtyrwa ban pyndonkam ïa ka jaka kan ïalam sha ka jingsyllen ki khlaw jong ngi – kiba donkam eh ban pynneh ïa ka jinglong-jingman mariang. Ka jingriewspah ka Meghalaya ha ki jingthaw ba don jingim bad ki jaka khlaw ki long ki jingdon-jingem kiba khraw jong ngi, bad ka jingduh noh kaba tang shi inshi ïa kane na bynta ki kam karkhana ka long ka bym lah pdiang,” u la ong.
U la ong ruh ba katkum ka kaiphod Centre for Research on Energy and Clean Air (CREA) ba la pyllait ha ka 8 tarik Lber, 2024, ka Byrnihat, ka jaka ba don ki karkhana ha ki khappud ka Meghalaya bad Assam, ka la ïoh ïa ka jingithuh kum ka jaka sor kaba jaboh tam ha India. Kane ka jaka ka la mad lypa ïa kiba buh ki jingeh ha ka liang ka jingjaboh bad da kaba wanrah shuh ki karkhana kan nang pynsniew shuh-shuh ïa ka jingjulor mariang.
U Bah Basïawmoit u la ong ba katei ka jingtyrwa ka pyntlot ïa ki bynta ba kongsan jong ka tnad ka rep ka riang bad ka Soil & Water Conservation naba kine ki tnad treikam ki long kiba donkam na bynta ka rep ka riang kaba neh bad ka jingpynneh-pynsah mariang – kiba long kongsan na bynta ka bit ka biang kaba neh jong ka Jylla.
“Ka Sorkar Jylla ka don ïa ki khana barim haba ïadei bad ka jingpynïaid bakla ïa ki tnad treikam karkhana Sorkar bad ki Corporation. Kane ka buh ïa ka jingsngewkhia halor ka jinglah bad jingseisoh jong katei ka jingtyrwa. Ki jingpulom ki kam ki kam ha ki por ba la leit ki kdew ba kane ka sienjam ym tang ba kan pynthut ïa ka jingtreikam jong ka tnad ka rep ka riang bad Soil, hynrei kan ym larkam ha ka ban kyntiew ïa ki kam karkhana,” u la ong.
Utei u nongïalam u la ong ruh ba ka don ka jingma ba ha ka jaka ban kyntiew ïa ki kam karkhana ba shisha, kane ha kawei ka liang ka lah ban shah bynda ne sha die sha ki kynhun shimet kiba don ka jingïadei kaba jan bad ka Sorkar.
“Kane kan long ka jingpyndonkam bakla ïa ka jaka paidbah bad ktah ïa ka bha ka miat jong ka Jylla,” la ong u President.
Shuh shuh u la bynrap ba ka seng kam pyrshah ïa ka thong jong ka Sorkar ban kynjoh ïa ka ïoh ka kot kaba 10 ‘Billion Dollar’ na bynta ka Jylla ne ba pynïeng ïa ki Industrial Estate, hynrei ka pyrshah jur ban ïapeiñ ïa ka tnad ka rep ka riang bad ka Soil & Water Conservation haba ïadei bad kane ka jingthmu.
“Ngi pyrshah jur ïa kane ka sienjam bad kyrpad ïa ka Sorkar ban wad ki lad ki lynti bad ki rukom ki ban pynneh kumjuh ban kynjoh ïa ka thong jong ka ïoh ka kot khlem da ïapeiñ pat ïa ka nongrim jong ka mariang bad ka rep ka riang jong ngi,” la ong u Bah Basaïawmoit.
