Shillong, Natiung 24
Ka Voice of the People Party (VPP) ka la pynpaw ka jingpyrshah haba ïadei bad ka jingaiti ïa ka jaka na ka tnad khlaw na bynta ka saiñdur ba ïadei bad ka jingpynitynnad ïa ka Wah Umïam.
“Ka seng ka pynpaw ka jingpyrshah halor ka jingpynbna ba dang shen jong ka Sorkar ban pynitynnad bad ban tei pynbha ïa ka jaka kaba ha ki sawdong-sawkun ka Wah Umïam, Ri-Bhoi District,” la ong u President ka VPP, Bah Ardent M. Basaïawmoit ha ka shithi ba la phah sha u Myntri Rangbah ka Jylla, u Conrad K. Sangma.
U la ong ba katba ka jingthmu ban kyntiew ïa ki kam jngoh kai bad ka ïoh ka kot ka long kaba sngew ïahap, hynrei kane ka jingpyrkhat ha kawei ka liang ka don katto-katne ki jingeh, khamtam haba ïadei bad ka jingpynneh-pynsah mariang bad ka bit ka biang jong ki nongshong shnong.
“Ka jingthmu ban mang 300 akar ka jaka na bynta ka jingpynitynnad ïa ka Wah Umïam ka lah ban buh jingma ïa ka basa jingim jong ka thaiñ. Kane ka sienjam ka lah ban ïalam sha ka jingsyllen ki khlaw, ha kajuh ka por kan pynthut ïa ka mariang jong kiba bun ki jingthung ba don jingim bad ki mrad ki mreng kumjuh ka jingtuid khyndew, ka ban ktah shi kat dei ïa ka jinglong-jingman jong ka um ha Wah Umïam,” u la ong.
Ka khana lum jingkheiñ mynbarim ka kdew ba ka Meghalaya ka la duh noh 17,100 hektar ki jaka khlaw hapdeng u 2014 bad 2020 bad da kaba buh jingmut ïa kane, ka long kaba kongsan ban ïada ïa ki jaka khlaw (kiba dang sah) ha ka jaka ban pynkylla ïa ki sha ki jingtei na bynta ki kam jngoh kai.
“Ka jingwanrah ïa ki jingïalehkai-um bad ki jingpynbyrngia ha ki sawdong-sawkun jong ka Wah Umïam ka lah ban nang ïalam sha ka jingjaboh, wat hapdeng ki jingkular ba ïadei bad ka jingpynkhie im biang ïa ki tyllong um. Ki kam ki jam jong ki briew bad ka jingjaboh kaba lah ban mih na ki lieng bad kiwei-kiwei ki tiar jingïalehkai-um ka lah ban ktah ïa kine ki jingpyrshang bad ïalam sha ka jingjulor mariang ka ban neh,” la ong u Bah Basaïawmoit.
Ha kajuh ka por, u la ong ba ka jingpynleit jingmut ban khring ïa ki nongshang kai pyrthei kiba ïoh ba kot lyngba kiba bun kiei-kiei kiba rem dor bad ka ‘Helicopter Service’, ka lah ban ym neh ne kynthup lang ïa baroh.
“Ka buh jingma ba ka jingpynlut kaba jur ha ki kam jngoh kai pyrthei kiba rem dor ka lah ban ym poi sha ki jingmyntoi jong ka ïoh ka kot kaba ngi la khmih lynti lada jia ba kam poi sha ka thong ha ka ban khring ïa ki nongshang kai pyrthei kiba ïoh ba kot,” u la ong.
Na ka liang u President u la ong ba kane ka jingthmu kaba mynta kan ym da pyrkhat than eh ïa ki jingdonkam bad jingsngewkhia jong ki nongshong shnong kiba shong ba-sah ha ki sawdong-sawkun ka Wah Umïam bad kumta, ki lah ban mad ïa ka jingshah pynkynriah jaka ne ki jingkylla ha ka rukom im khlem ka jingïamir jingmut kaba biang bad ka bai lutksan sha ki.
Ha kawei ka liang, u la ong ba ka surok kaba la don lypa kam pat biang ban kyrshan ïa ka ïaid ka ïeng ba mynta jong ki kali bad kumta ka jingwanrah ïa kino-kino ki bynta kiba ïadei bad ki kam jngoh kai kiba lah ban ïalam sha ka dheng kali khlem ki jingpynbha kiba bit ba biang haba ïadei bad ka jinglong-jingman ka surok, ka lah ban nang buh jingeh ha ka liang ka dheng kali bad kan nang pynsniew pynban ïa ka surok.
“Kumta dei ban khmih bniah halor ka saiñdur ban pynduna ïa ka jingkhapngiah ka Shillong bad ban pyntreikam, ha shuwa ban wanrah ïa kino-kino ki bynta ba ïadei bad ki kam jngoh kai bad kiba lah ban ïalam sha ka dheng kali,” u la ong.
Shuh shuh u la Bah Basaïawmoit u la bynrap, “Wat la ka seng kam pyrshah ïa ki kam pynroi bad ka jingpynïar ïa ka tnad kam jngoh kai hapoh ka Jylla, ngi ngeit skhem ba kiba kum kine kiei-kiei kim dei ban wan da kaba ktah pat ïa ka jingpynneh-jingpynsah mariang bad ka bha ka miat jong ki nongshong shnong. Ngi kyntu ïa ka Sorkar ban pyrkhat biang halor kane bad wad ki lad ki lynti – ki ban pynneh-pynsah, ha kajuh ka por ki ban kynjoh ïa ka thong jong ka ïoh ka kot bad ki kam jngoh kai.”
