Shillong, Naitung 24
Ka Sorkar Pdeng ka la pynkut T.2,859 klur haduh u Jylliew jong u snem 2024-25 na bynta ki National Highway ha ka thaiñ Shatei Lam Mihngi (North East) bad la dep shna kumba 78 km ki National Highway ha kane ka Thaiñ haduh u Jymmang mynta u snem 2024.
Ïa kane la ïathuh ha Ïingdorbar Lok Sabha lyngba ka jubab kaba la ai da ka tnat Development for North Eastern Region (DoNER) lyngba u Myntri Khynnah, u Dr Sukanta Majumdar.
La ong ba ki bun ki jingtei jingshna surok bad kiwei ki jingshna kiba ïadei bad ka kit ka bah kiba la leh da ki tnat treikam bapher bapher ka Sorkar Pdeng hapoh ka thaiñ Shatei Lam Mihngi naduh ki surok kum ka SARDP-NE, Bharatmala-I, ban pynïasoh bad kiwei pat ki bynta jong ka ri lyngba ka East-West Corridor.
Ki jingpynïasoh lyngba ki lad liengsuiñ ki la kiew sha ka 17 tylli haduh u snem 2023 haba ïanujor bad 9 tylli haduh u snem 2013.
Lyngba ka rel, ki jingpynïasoh ki la kham biang shuh shuh hapoh ka thaiñ Shatei Lam Mihngi bad sha kiwei pat ki bynta ka India ha kaba ki don 18 tylli ki projek lynti rel ha ka jingjrong kaba 1,368 km bad jingmang pisa kaba T.74,972 klur ha kaba 313 km la lah ban pyntreikam ha ka jingmang pisa kaba T.40,549 klur kaba la pynlut haduh u Lber 2024.
