Shillong, Naitung 24
Ki sengbhalang bapher bapher hapoh ka jylla ki la rai ban leit tied jingkhang biang ïa u Conrad Sangma, Myntri Rangbah ka Jylla ban pyntreikam ïa ki aiñ ban ïada ïa ka jingwan rung kyrthep ki bar jylla.
Kine ki sengbhalang ki kynthup ïa ka KSU, FKJGP, HNYF, RBYF, JSU, AYWO, GSU, FAF kiba la shong jingïalang mynta ka sngi ha Shillong.
Haba ai jingkren sha ki lad pathai khubor, u President ka FKJGP u Bah Dundee Khongsit u la ong ka jingkuman ka sorkar ka la pynlong ïa ki sengbhalang ban ïakynduh biang mynta ka sngi ban leit tied jingkhang ïa ka sorkar ban tehlakam ïa ka jingrung ki bar jylla.
U la ong ba ka jingbym shimkhia ka sorkar ïa ka jingrung kyrthep ki bar jylla da ki phew snem ba la ïaid lynti ban tehlakam ïa kiwei ki jaidbynriew ka la pynlong ïa ki sengbhalang ban nym lah shuh ban ap.
U la ong ha kane ka jingïalang la ïakren ba ka sorkar ka kheiñ sting hynrei haba la khynra ïa ka jingwan rung kyrthep ki bar jylla ka sorkar ka sdang ban pyni bor.
U Bah Sadon Blah kum u President ka seng HNYF, u la ong ba ka sorkar kam lah ban tehlakam ïa ka jingrung kyrthep ki bar jylla namar ka tieng ïoh kam ïoh vote shuh ha ka por ilekshon.
U la ong ba ka aiñ Meghalaya Residents Safety and Security Act, 2016 ka la kdew shai ba ka don ka jaka rung bad jaka mih hynrei haduh mynta ka sorkar kam shym la pyntreikam hynrei ka shu pynlong tang ka jaka peit bniah ïa kiba ngat ha ka jingpang covid ha kito ki snem.
“Lada ym pat lah ban pyntreikam ïa ka jingpynkylla ïa ka MRSSA, dang pyntreikam noh ïa ka aiñ kaba la dep mynjur ha u snem 2016 hynrei ïa kane ym shym la leh” u la ong.
Nalor kane, u la ong lada ïakhih ki sengbhalang ki sorkar ka aidaw ba ktah ïa ki kam jngohkai pyrthei hynrei lada sahkut da ki kynta ha jingkieng Umïam ka sorkar kam kren eiei ïa ka jingktah kiba wankai sha Meghalaya.
“Ngi la shim ïa ka rai ba lada ka sokar ka duna briew ban pyntreikam ïa ka aiñ MRSSA ngin ïarap ma ngi ki sengbhalang” u la ong.
Na ka liang u Bah Lambokstarwell Marngar kum u President ka KSU, u la ong ka MRSSA 2016 la pyntreikam namar ki ong ha kito ki por ba ka ILP ka dei ha kti jong ka Sorkar India hynrei ïa kane ka aiñ ba la dep shna dang set synduk haduh mynta.
Ha kajuh ka por u la pyntip ba ki sengbhalang ki la shim ïa ka rai ha kane ka jingïalang ban khynra hi ïa ka jingdon ki bar jylla ki bym biang kot.
