Shillong, Naitung 25
Ka Meghalaya Boxing Association (MBA) ka ai khublei ïa arngut ki shipara, u Torak Kharpran bad Larry Kharpran hadien ba ki la shah jied ban mihkhmat ïa ka ri India sha ka Paris Olympic 2024.
Ka MBA ka la pynpaw ba kine arngut ki la shah jied kum u Coach bad u nongpeit pyrman (observer) na ka bynta katei ka lympung ka ban sdang naduh 26 tarik mynta u bnai ha Paris.
Kane ka jingshah jied jong ki ka pyni ïa ka jingtrei shitom bad ka jing-aiti lut jong ki ha ka kam ba la bynshet na ka bynta ka Boxing.
U Torak un long uwei na ki Coach jong ka kynhun ïakura jong ka ri India, katba u Bah Larry lem bad kiwei ki la shah jied kum ki nongpeit pyrman na ka bynta ka Boxing ha ka Olympic kaba la buh ban pynlong naduh ka 27 tarik mynta u bnai haduh ka 5 tarik u Nailar.
“Ngi sngewsarong na ka bynta kine baroh ar ngut bad ïa ka jingshah jied jong ki,” la pynpaw u Bah Dondor Marweiñ, General Secretary jong ka MBA. “Ka jingshah jied jong ki ha ka kynhun ïakura ka paw ba ka dei ka jingtrei shitom bad ka jingshitrhem jong ki na ka bynta ka Boxing. Ka jingshah jied jong ki ka long ruh ka burom na ka bynta ka synjuk bad na ka bynta ka jylla hi ruh baroh kawei,” u la bynrap.
