![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Naitung 25
Ka All Meghalaya SSA Non Teaching Staffs Association (AMSSANTSA) ka la rai ban pynlong da ka jingshong kyllaiñ-myngor ba khlem buh por ka ban sdang naduh ka 29 tarik mynta u bnai na ka bynta ban dawa biang na ka sorkar ba kan pynurlong ïa ki jingdawa ba kum ka seng ka la buh hakhmat.
Ïa kane ka rai ban ïakhih, na ka liang jong ki nonghikai ki la shim ha ka jingïalang kaba ki la pynlong ha ka Sngi Palei ha madan Malki. Kane ka rai ban ïakhih ka long ban dawa na ka Sorkar Jylla ba kan pynkloi ban pyndep ïa ki jingkular ban kyntiew ïa ka tulop ki nongtrei SSA-Non-Teaching Staff hapoh ka Jylla.
Shuh shuh ha ka kyrwoh ba la pyllait da ka AMSSANTSA ka la ong ba ki mat jong kane ka jingïalang ba la pynlong ha kane ka sngi, ka long ba la ïakren halor ka jingdawa kaba la slem, kata ban kyntiew ïa ka tulop jong ki SSA-Non-Teaching Staff ïa kiba la tip mynta kum ki Samagra Shiksha, ka jingdawa kaba la sahteng bad kaba na ka liang jong ka sorkar kam pat shym la lah ban pynurlong mynta wat la ka la ïaid phra snem.
“Ngi la ïa rai lang ban pynlong da ka jingïashong kyllaiñ-myngor ba khlem buh por kaba ngin sdang naduh ka 29 tarik mynta u bnai tad haduh ba ka Sorkar ka la kloi ban pyndep ïa ki jingkular ban kyntiew ïa ka tulop jong ngi,” la ong ka kyrwoh.
Ka Synjuk ka la pynkynmaw ruh ba u Myntri ka tnat Pule Puthi ka jylla u Rakkam A Sangma ha ka jubab hapoh ka ïingdorbar ha u 2023, u la pyntip ba ka tnat ka la dep phah ïa ka ‘file’ ba ïadei bad ka jingtyrwa ban pynkiew ïa ka tulop jong ki SSA Non-Teaching Staff sha ka tnat Finance hynrei sngewsih ba haduh mynta ym pat shym la leh eiei halor kane ka bynta.