Nongpoh, Naitung, 25
U President jong ka Voice of the Peoples Party (VPP) u Bah Ardent M Basaiawmoit ha ka Sngi Palei u la ai khublei kyrpang ïa ki paidbah jong ka Ri-Bhoi District kiba la ai jingkyrshan bad pynjop donburom ïa u Dr Ricky AJ Syngkon kum u MP bathymmai ka Shillong Parliamentary Constituency.
Ïa kane ka jingai khublei u Bah Ardent u la pynsngew ha ka jingïalang kaba la pynlong ha ka Sngi Palei ha ïew Mawlong.
“Ym don ba mutdur, ym don ba khmih kynti, ki don kiwei ki seng kiba pynlong biria ïa ka VPP ha ka por jong ka jingkren ha ka rynsan ïalap ilekshon. Kiba kren kumba kata ka seng kam poi shano-shano, hynrei katba nang mih ki sngi, ka jingïaid lynti, ngi la sngewthuh ba u paidbah u la phai khmat sha ngi ka VPP,” la ong u Bah Ardent.
Utei u nongïalam ka VPP u la ong ruh ba bun kiwei ki seng saiñ hima sima kiba heh, ki dang mutdur ba ka VPP kan shu lait salit lane malu-mala, hynrei da ka jingjia ryngkhat, haba ka VPP ka la tam haduh lai lak hynñiewphew hajar tam pyrshah ïa ki, ka la shaïong ngaiñ bad ki don ruh kiba ktha khlieh haduh mynta, ki bym pat peit mat na kata ka jingshaïong ka jong ki.
U Bah Ardent u la ong ruh ba kam don satia ka bor kaba lah ban ïeng hakhmat u paidbah bad kan nym don ruh ka jingshah pynsheptieng kaba lah ban pyntieng ïa ki paidbah. Dei na kata ka daw ba ka VPP ka la ïoh ïa ka jingjop kaba donburom ha kane ka ilekshon MP kaba dang shu dep.
U la ong ruh ba ka VPP kam dei satia ka seng kaba mih tang ban ïakhun ilekshon lane ban leit sha u paidbah tang shisien san snem, hynrei ka dei ka seng kaba mih ban ïalur ïa ka lyngkha na ka bynta ka jingeh bad ban pynïatylli ïa ka jaidbynriew, bad ruh ban ïaid ryngkat ryngkat bad ki paidbah khlem da ñiew la ki dei ki pnar, ki khynriam, ki bhoi, ki war ne ki maram ki lyngngam.
U Bah Ardent u la ong ruh ba kum ka seng kumba ka la ïoh ïa ka jingkyrshan kaba pura ha kane ka ilekshon MP kaba la dep, ka don ruh ïa ka jingngeit bad jingkyrmen skhem ba u paidbah un ai ruh ïa ka jingjop ha ka ilekshon MDC bad MLA ruh ki ban sa wan naba kum ka seng hi ka ngeit ha ka bor jong u paidbah ban wanrah ïa ka jingkylla. U la bynrap ruh ba ha shwa ba un leit noh na kane ka sla pyrthei, u kwah ban ïohi ba ka jaidbynriew kan long kaba ïatylli kawei khlem da kheiñ la ki dei ki pnar, ki khynriam, ki bhoi ki war ne ki maram ki lyngngam ne ki dei na kano-kano ka niam ruh.
Ha kane ka sngi la wan ruh ban ïadon ryngkat da u Bah Brightstarwell Marbaniang, MLA ka VPP na Mawlai nalor kiwei kiwei ki nongkitkam ka seng na ka jylla bad ruh na Ri Bhoi District.
