Shillong, Naitung 25
Ka Nongthymmai Nongkynrih SC lem bad ka Laitumkhrah SC ki la lah ban pynthikna ban jam sha ka quarter final ha ka lympung ïalehkai U-20 Fourth Division Football League ba la pynïaid da ka ka Shillong Sports Association.
Kine kynhun ki la ïasoh lang bad kiwei pat 14 tylli ki kynhun kiba la ïoh rung sha katei ka kyrdan ïalehkai. Kine ki long ka Thynroit SC, Umrynjah SC, Laitkroh SC, New Challengers SC, Umïew Maw-U-San SC, Pynthorbah SC, Nongkohlew SC, Mawlynrei SC, Them Rangshken SC, Mawphlang SC, Madanrting SC, Diengpasoh, Mawpdang SC bad ka Madan S&CC.
Ha ka jingïalehkai kaba khatduh jong ka Group-C kaba la long ha ka sngi Balang ha SSA Stadium Polo, ka Nongthymmai Nongkynrih SC ka la pynliem noh ïa ka Umsohsun SC da 5-0 kol. U Ïaikyrmenskhem Shynret u la khur ïa ka hat-trick da kaba thep haduh saw kol (4, 22, 37 & 69), katba ïa kawei pat la pynbud da u Kheiñkor Nongrum (61).
Haba phai sha kawei pat ka jingïakhun jong ka Group-E, ka Laitumkhrah SC ka la jop da 2-0 kol ïa ka Riatsamthiah SC. Ïa kine la thep da u Fidical Pohshna ha ka minit kaba 49 bad u Hamlet Thabah (53).
Kane ka jingïakhun pre-quarter final kan sdang naduh ka 27 tarik ha kaba ka Thynroit kan ïakhun pyrshah ïa ka Umrynjah ha ka por 1:30 mynsngi, katba ka Laitkroh ïa ka New Challenger ha ka por 4 baje janmiet. Ïa kine ki jingïalehkai yn pynlong ha SSA Stadium kaba ha First Ground, Polo.
Kat kum ka kyrwoh ba la pyllait da ka SSA, la ong ba ïa ki jingïakhun quarter final yn sdang naduh ka 1 tarik haduh 7 tarik u Nailar, katba ïa ka semi final yn pynlong ha ka 9 bad 12 tarik u Nailar. Ïa ka jingïakhun yn pynlong ha ka 24 tarik u Nailar.
