Shillong, Naitung 25
U Myntri ka tnat Korbar Ri, u Amit Shah u la kular ïa ki Chief Executive Member (CEM) bad nongmihkhmat jong ki 10 tylli ki Autonomous Council na ki Jylla ka Thaiñ Shatei Lam Mihngi ban pynbeit noh ïa ki jingeh jong ki Council ha kaba u la pynbna ruh ban buh da ka Committee kaba yn khlieh da u Myntri khynnah ka tnat Korbar Ri, u Nitin Rai na ka bynta ki mat kiba ïadei bad ka jingpynkylla ïa ka Khyrnit Bahynriew (6th Schedule) jong ka Riti Synshar.
Ka kynhun ki CEM bad MDC jong ki 10 tylli ki Autonomous Council ka la ïakynduh ïa u Amit Shah ha ka janmiet Sngi Palei ha New Delhi hadien ba ki la ap kumba lai sngi lynter.
Haba ïathuh ïa ka jingmih na ka jingïakynduh, u CEM ka KHADC u Bah Pynïaid Sing Syiem, u la ong ba ka jingïakynduh ka long kaba biang namarba u Myntri korbar ri u la sngap ïa ki jingpynsngew bad kular ban pynbeit noh ïa ki jingeh jong ki 10 tylli ki Council khamtam ha kaba ïadei bad ka jingpynkylla ïa ka Sixth Schedule ha kaba yn don ka Committee kaba khlieh da u Nitin Rai ka ban peit ïa kane ka kam hapoh shibnai.
U Bah Pynïaid u la ong ba ki 10 tylli ki Council kiba dei na Assam, Meghalaya, Tripura bad Mizoram ki don la kijong kijong ki jingeh bad na ka liang u Myntri korbar ri u la sngap ha ka jingïakynduh kaba la neh kumba shiteng kynta tam.
Shuh shuh u Bah Pynïaid uba long ruh u Convener jong ki 10 tylli ki Council u la ïathuh ba kan sa don ka jingïakynduh hapdeng ki CEM bad MDC jong baroh ki Council ka ban sa long ha Shillong ha ka 10 tarik Nailar.
U Chairman ka The Indigenous Progressive Regional Alliance (TIPRA) u Pradyot Debbarman u la ong ba ka long ka jingkmen ba u Myntri korbar ri u la kular ba hapoh shibnai yn sa pynbeit noh ïa ki jingeh kiba la pynsngew bad kane ka mut ba la kumno-kumno ha ka 25 tarik Nailar mynta u snem.
U la ong ba na ka liang u Shah u la ong ruh ba kano-kano ka soskular kaba la soi ha ka por jong kawei pat ka Sorkar, ïa kata yn burom bad pyndep namar kano-kano ka soskular kaba soi la ka dei ha ka por jong ka BJP ne Congress ka dei hi ka soskular jong ka Sorkar India.
“Kaba kongsan tam ka long ba ngim kwah ban leit da ka lynti jong ka jingpynibor hynrei ngi kwah ban ai ka hok jong ki briew jong ngi, ka jaitbynriew bad lada ngi lah ban kiew da kane ka rukom, ngi pdiang ruh ha ka rukom kaba beit,” la bynrap une u nongïalam na Tripura.
