Shillong, Naitung 25
Ka Hynñiewtrep Youths’ Council (HYC) ka la pynpaw ba lada ki bor pynïaid jong ka Khasi Hills Autonomous Dis-trict Council (KHADC) kim lah ban pyntreikam ïa ki aiñ, ka la bha ban khang tala shwa ïa ka District Council.
Kane ka jingkren bynñiaw ka la wan na u President ka HYC u Bah Roy Kupar Synrem hadien ba kum ka seng ki la leit ban ïakynduh ïa u Executive Member (EM) ka tnat Trade ka KHADC u Bah Gigur Myrthong na ka bynta ban dawa ba dei ban khang tala ïa ka karkhana Resource Rubber Private Limited kaba don ha 11 Mer, Mawsmai, Ri-Bhoi District kaba la long trai da u Joginder Pal Kapoor.
Ha kane ka jingïakynduh ïa u EM, ka HYC ka la ai por hynñiew sngi ïa ka Khasi Hills Autonomous District Council (KHADC) ba ka dei ban khang tala noh ïa katei ka karkhana saiñ jri.
Haba kren sha ki lad pathai khubor hadien ka jingïakynduh ïa u EM, u Bah Roy Kupar u la ong ba wat na ka liang u EM ruh u la kubur ba ki kot ki sla jong u Joginder Pal Kapoor ki la kut noh ha u bnai Ïaïong mynta u snem bad haduh mynta, une u bar jylla u khlem pat pynthymmai (Renew).
U Bah Roykupar u la pynksan ba ka jingleit khang tala ka HYC ïa katei ka karkhana saiñ jri ka dei namar ba ka District Council ka khlem leh ïa la ka kamram, hynrei kaba lyngngoh pat ba ki pulit pat ha ka Sngi Balang ki la leit pynpait noh ïa ka tala.
Utei u nongïalam ka HYC u la ong, “Lada ka KHADC kaba shna hi ïa ka aiñ kam lah ban pyntreikam bad kam nud ban khang ïa katei ka karkhana kaba la pynïaid beaiñ khlem kot khlem sla, kan bha ban khang noh syndon ïa ka ophis KHADC.”
Shuh shuh u la ong, “Ka KHADC kaba thaw ïa ka aiñ, hynrei kaba lyngngoh pat ki bor pynïaid ka Council ki khlem leh ïa ka kamram ban leit khang tala wat la ki kot ki sla jong kane ka karkhana ki la kut naduh u bnai Ïaïong 2024.”
Ha kawei pat ka liang, une u nongïalam ka HYC u la ong ba ka jingleh jong ki pulit ka Ri-Bhoi District bad u Joginder Pal Kapoor ka long kaba beaiñ bad kaba long pyrshah ïa ka Regulation of Trading by Non-Tribal 1954.
