Shillong, Naitung 25
Ka kynhun ïalehkai kriket ka ri India kan pynkhreh ïa ka jingïakhun kaba nyngkong ha ka T20I pyrshah ïa ka Sri Lanka ha ka sngi Saitjaiñ.
Kane ka kynhun hapoh ka jingïalam u coach ba thymmai u Gautam Gambhir bad u kapten u Suryakumar Yadav, ka la poi ha Sri Lanka ha ka lah sngi U Blei.
Kane ka kynhun ïalehkai jong ka India kaba don 15 ngut ryngkat ki nongkyrshan ki la mih noh na Mumbai ha ka lah sngi U Blei bad ka la Pallekele ha kajuh ka sngi hadien ba ki la sahkut khyndiat por ha Colombo.
Te kumta ka India ka la thmu ban ïakhun ïa ki lai tylli ki jingïakhun ha ka T20I pyrshah ïa ka Sri Lanka. Kaba ar ka jingïakhun kan long 28 tarik bad kaba khatduh kan long ha ka 30 tarik. Kane ka kynhun kan leit sha Colombo ban ïakhun ïa ki lai tylli ki jingïalehkai ba shisngi kiba la buh ban long ha ka 2, 4, bad 7 tarik u Nailar.
Ha kane ka kynhun ki don katto katne ngut ki samla, ha kaba u Shubman Gill u long kum u vice-captain. Ki rangïalehkai ki bym shym la lah ban ïadon lang bad kane ka kynhun ki kynthup ïa u Rohit Sharma, u Virat Kohli, bad u Ravindra Jadeja, kiba la pynbna ba kin shongthait noh na ka T20I hadien ba ka India ka la ïoh ban khur ïa ka nam lahduh ha ka T20 World Cup ha Caribbean.
U Suryakumar Yadav u la shah thung kum u kapten ba thymmai jong ka T20 ha ka taïew ba la dep, ha kaba u la shimti ïa ka kam na u Hardik Pandya u rangïalehkai ba lah ban ïalehkai baroh ki bynta na ka daw ka jingbym khlaiñ ha ka met. Ha kane ka kynhun la kynthup ruh ïa ki nongïalehkai kiba la tbit kum u Sanju Samson, u Hardik Pandya, Mohammed Siraj bad u Arshdeep Singh.
