Nongstoiñ, Naitung 25
Da ki spah ngut ki nongbylla tih shyiap bad tih maw ha ka thaiñ Nong-stoiñ kiba im sngi ban pyndap ïa ka ïing ka sem da kane ka kam ha ryngkat ki ‘riew rangbah jong ka thaiñ Nongstoiñ, ha ka Sngi Palei ki la leit ban tur kyndit-kynsan sha ka shlem treikam u Divisional Forest Officer (DFO), West Khasi Hills ban pynpaw ïa ka jingpyrshah hadien ka jingmad jingeh na ka jingshah khang.
La ïathuh ruh ba katei ka jingleit tur jong ki paidbah nongbylla tih maw tih shyiap sha katei ka shlem treikam ka dei lyngba ka jingïalam jong katto-katne ki rangbah ka thaiñ Nongstoiñ ba kynthup ïa u Bah Mosklandar Marngar bad u Bah Mawkordor Kharsyiemlieh hadien ka jingwan ud jingwan nam ka jong ki ba ki la mad ïa ka jingeh kaba khraw. Kumta ha ryngkat ki paidbah ki la leit sha shlem treikam jong u DFO ban pan jingshai bad ban dawa ruh ba kim dei shuh ban pynthut ïa ki kam khat shyiap tih maw khnang ba ki paidbah kin ïa ïoh bylla hynrei kumba long mynta ki lah duh syndon ïa ka bylla ka sngi bad wat tang ban pyndap ïa ka ïing ka sem kim lah shuh.
Shuh shuh la ïathuh ba ha katei ka jingleit tur jong ki paidbah, na ka liang u DFO u la khot ban ïakren, bad ha kaba u la kren shai ba ym lah ban leh eiei namar ka aiñ ka treikam beit katkum ki kyndon hynrei u la kular pat ba na ka liang ka jong u, un shimkhia ban rah da ka jingthoh sha ki bor bahalor.
La ong ruh ba ha katei ka sngi hadien ka jingpynshai jong u DFO, na ka liang jong ki paidbah ki la mih noh na katei ka shlem treikam ban leit phai noh, hynrei da kawei ka jingmut ki la shim ruh ïa ka rai ban leit ïakynduh kyrkieh noh ïa u Myntri Rangbah ka jylla bad ïa ki nongmihkhmat ba kin peit bniah bad peit sani bha ha kaba ïadei bad kyndon lane ki aiñ halor ka jingkhang tih shyiap bad tih maw ba ym dei ban shu pynbud ïa ki aiñ jong ki ri thor hynrei ki dei ban da peit janai bha.
