Shillong, Naitung 25
Ka Voice of the People Party (VPP) ha ka Sngi Thohdieng ka la pynpaw ïa ka jingsngewkhia kaba jur bad ka jingbym hun ïa ka jingpynbna ba dang shen na ka Meghalaya Public Service Commission (MPSC) ha kaba ïadei bad ka MCS Preliminary Examination 2022-2023, kaba la long ha ka 4 tarik Naiwieng, 2023. Kane ka jingpynbna, kaba la pynmih ha ka 23 tarik Naitung, 2024, ka la pynrung sa kumba 62 ngut ki kyrtong kiba la ‘pass’ nalor jong kito kiba la dep ban pynbna mynshwa. Kane ka jingpynkylla ka long hadien ka jingujor da uwei u kandidet halor ki jingkylli ba la ai ha ka eksamin.
Ha u kyrwoh khubor, u Dr Kara Chen, Vice President ka VPP, u la buh katto-katne ki jingkylli bad ki mat kiba kongsan ha kaba ïadei bad kane ka jingpynkylla kynsan bad kaba pynmih ïa ka kynrum-kynram.
U Dr Chen u la ong ba ka don ka jingbym long kaba shai bad kaba hok ha kaba ka rai jong ka MPSC ban peit biang ïa ki kot jubab hadien ka jingujor ka pynmih ïa ka jingsngewkhia kaba jur shaphang ka jinglong kaba shai bad kaba hok.
“Ym pat lah ban tip hapoh kano ka kyndon aiñ ba la pynlong ïa kane ka jingpeit bniah biang. Kum kane ka jingpynkylla ïa ka ‘result’ ka pynduhjait ïa ka jinglong hok jong ki eksamin paidbah bad ka buh jingkylli shaphang ka jinglong hok ha ka rukom treikam jong ka jingshim rai jong ka MPSC,” la ong u Vice President ka VPP.
Nalorkata, u la ong ba ka por kaba long hadien hynñiew bnai naduh ba la pynbna ïa ka ‘result’ bad ka jinglong jong ka jingpynbna ïa ka ‘result’ ba la pynthymmai, ka pynmih ïa ka jingsheptieng halor ka jinglah ban don ka jingïarap bahaïing hasem ne paralok.
Ka jingpynbna ïa katei ka ‘Result’ ha ka 23 tarik Naitung, 2024 hadien ba uwei na ki kyrtong u la ujor, bad kiwei pat ki kyrtong ki la shah pynbna ba ki la ‘pass’ hadien ka jingujor. U Dr Chen u la ong ba kane ka pynmih ïa ka jingsngewkhia ba lehse ka lah ban don ka jingleh shiliang, bad ka jingkylli ka long ruh ba hato la pyndonkam ïa kane ka rukom peit bniah biang ban pynrung da ki kyrtong, kiba ha ka jingshisha, ki khlem lah ban ‘pass’ ïa katei ka eksamin?
Shuh shuh u Dr Chen u la ong ba kane ka jinglong ka pynpaw ruh ïa ka jingbymlah bad jingbym shimkhia kaba lah ban mih na ka liang jong ka MPSC. Ka jingdonkam ban pynkylla ïa ka ‘Result’ katkum ka jingujor ka kdew ïa ki jingduna kiba lah ban don ha ka rukom leh eksamin. U la ong ba kum kine ki mat ki pynduh ïa ka jingshaniah jong ki paidbah ha ka MPSC bad ïa ka jinglah jong ka ban pynlong ïa ki eksamin kiba hok bad kiba lah ban shaniah.
Na ka liang ka VPP, namarkata, ka la dawa ban bishar bniah mardor bad ïa ka rukom peit bniah biang kaba la pynlong da ka MPSC.
“Ngi kyntu ïa ka sorkar ban ai jingshai halor ki kyndon bad ki aiñ kiba synshar ïa kiba kum kine ki jingpynkylla bad ban pynthikna ba ki eksamin kiba hadien kin bud ryntih ïa ki kyndon khnang ba kan don ka jinglong hok bad jinglong khuid,” la ong u Dr Chen.
U la ong ruh ba ka VPP ka ïeng skhem ha ka jingangnud jong ka ban bat ïa ki nongrim jong ka hok bad ka jinglong hok ha ki eksamin paidbah. “Ngi khot ïa ka sorkar ban weng noh kloi ïa kine ki jingeh bad ban shim ïa ki lad ki lynti ban pynbeit khnang ba ka MPSC kan ïoh biang ïa ka jingshaniah ha kaba ïadei bad ka jingpynlong ïa ki eksamin,” la bynrap u Dr Chen.
