![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Naitung 25
Ïa ka Paris Olympics 2024 yn plie pyrda ha ka miet jong ka Sngi Thohdieng ha ka wah Seine. Ha kane ka lympung ïalehkai kaba paw ha ka pyrthei, ka India kan ïadon bynta lang bad kiwei pat ki ri ka pyrthei.
Ïa kane ka lympung yn sdang ha ka por 11 baje mynmiet ha kaba kan long ka sien kaba nyngkong ha ka histori jong ka Olympic ba ïa ka jingïalang plie yn nym pynlong hapoh ka madan ïalehkai. Ka jingïaid ki kynhun ïalehkai jong ki ri bapher bapher kan long harud ka wah Seine, kaba tuid lyngba ka jaka pdeng jong ka nongbah ba pawnam jong ka ri France.
Ha kane ka jinglehkmen kaba nyngkong eh, p]alat 10 hajar ngut ki nongïalehkai Olympic kiba ïaid lyngba kumba 100 tylli ki lieng kin ïaid lyngba ïa ka wah Seine bad kin ïaid lyngba ki katto katne ki jaka ba pawnam jong ka Paris, kynthup ïa ka Notre Dame, ka Pont des Arts, ka Pont Neuf bad kiwei kiwei.
Kane ka jingïaid paidbah kan mih na ka jingkieng Austerlitz hajan ka Jardin des Plantes bad kan kut ha ka Trocadero, ha kaba yn pynlong ïa ki bynta ba dangsah jong ka Olympic bad ki jingpyni ba khatduh. Kane ka prokram la buh ban neh palat lai kynta.
U Thomas Jolly, uba dei u nongpyniaid theatre bad u tyngshop na France, uba peit ïa ka jingïalehkai Olympic bad Paralympic jong ka Paris 2024 kum u artistic director.
Ka khlur badminton ka ri India ka PV Sindhu, kaba long ka nongïalehkai kaba la khur takma arsien ha ka Olympic, bad u Sharath Kamal, u rangïalehkai table tennis, uba la thmu ban ïashim bynta ha ka Olympic ha ka sien kaba san, kin ïalam ïa ka kynhun ïalehkai ka India ka jingplie ia kane ka lympung.
Baroh arngut kin long kiba nyngkong eh na la ki jong ki jingïalehkai ban long ki nongrah lama jong ka India ha ka jingïalang plie ïa ka Olympic.
Kane ka kynhun ïalehkai jong ka ri India ka la wanphai biang da ki hynñiew tylli ki takma ha Tokyo Olympic 2020, ba kynthup ruh ïa ka takma ksiar ba nyngkong eh na ka jingïalehkai athletic lyngba u nongkawang sum (javelin throw) u Neeraj Chopra. Ha Paris, baroh 112 ngut ki nongïalehkai na ka ri India kin ïashim bynta ban khur 69 tylli takma na ki 16 tylli ki jingïalehkai. Ka India ka la pynkhreh ruh sa san ngut kiba la pynaplypa ha kane ka lympung ha Paris.
Ha kane ka jingïalang plie ïa ka Paris 2024, ki shynrang na India kin phong da ki jaiñ phong kurta bundi, katba ki kynthei kin phong da ki sari kiba ïahap, kiba pynpaw ïa ka lama lai rong jong ka India. Ïa kine ki jaiñ, kiba don ïa ki dur tynrai ba la shna da ki jaiñ Banarasi bad ba la shna pynwandur da u Tarun Tahiliani.