Shillong, Naitung 25
Hadien ba ka Meghalaya Public Service Commission (MPSC) ka la pynmih sa ha ka sien ba-ar ïa ka thup jong kiba pass ïa ka eksamin Civil Services (Prelims), ka jingkylli mynta ka la mih ha kaba ïadei bad ka rukom pynlong ïa kane ka eksamin ha kaba u nongïalam ka All India Trinamool Congress (AITC), u Dr Mukul Sangma ruh u la buh jingkylli bad kynnoh ba ka dei ka kam runar kaba la ïasylla lypa.
Ka MPSC ka la pynbna biang ïa ka result ha ka wat ba-ar hadien khyndiat bnai ba ka la dep pynbna ïa ka result jong ka eksamin Civil Services.
Ïa ka eksamin Civil Services (prelims) la pynlong da ka MPSC ha ka 4 tarik Naiwieng, 2023 bad la pynbna ïa ka result jong kiba ïakhun ïa ka eksamin Civil Services (Prelims) ha ka 15 tarik Nohprah, 2023. Kaba pynlyngngoh ïa kiba bun ka long, hadien hynriew bnai, ka MPSC ka la pynmih biang sa kawei ka result ha ka 23 tarik Naitung, 2024 ha kaba la paw ki Roll Number jong 62 ngut kiba pass ïa ka eksamin.
Katkum ka jingpynshai ka MPSC ha ka 23 tarik Naitung, 2024, la ong ba hadien ba la ïohpdiang ïa ka jingthoh na iwei na kiba ïakhun ïa ka eksamin ha kaba ïadei bad kawei ka jingkylli na ka bynta ka Meghalaya Civil Services (P) Examination 2022 & 2023 kaba la pynlong ha ka 4 tarik Naiwieng, 2023, ïa ki jingkylli la wanrah biang sha u riewshemphang ban khmih bniah. Kumta halor ka jingai jingmut u riewshemphang, ïa ki OMR Answer Sheets la khmih biang ha kaba ki kyrtong kiba ïakhun ïa ka eksamin kiba don ïa ki Roll Nos (62 ngut) la pynbna kum kiba don ha ka thup jong kiba pass nalor ka thup kaba nyngkong kaba la dep pynmih ha ka jingpynbna kaba 15 tarik Nohprah, 2023.
Ïa ka eksamin Civil Services (Mains) yn pynlong ha ka 23 tarik Nailur, 2024.
Haba buh jingkylli bad kynthoh, na ka liang u Dr Mukul u la wohnia ïa kane ka jingleh ka MPSC ha kaba u la kylli, halor ki kyndon aïu ba la shah ban leh kumne namarba ym don satia kum kata ka kyndon kaba shah ban khmih bniah biang namarba lada ki bor ba dei khmih ki kubur ba ki don ki jingbymbiang ha kaba ïadei bad ki jingkylli bad syllabus, ka mut ba ka eksamin ka dei kaba bakla bad kynrum-kynram.
“Kane baroh ka pyni ba ka don ka jingleh kaba phaikhmat ïano-re-ïano ha ka jingjied ïa kiba pass bad ka dei kaba beaiñ haduh katta katta,” la kynthoh u Dr Mukul.
U la ong ba kane ka jingleh ka dei ka kam runar kaba ïasylla lypa (criminal conspiracy) khnang ban myntoi ki katto-katne kiba dei ban shahjied lypa bad ka dei ka jingleh kaba ym lah ban lait na ka jingtohkit.
