![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Naitung 25
Ka samla Khasi kaba trei ha kawei ka restaurant ha Sylhet, kaba dei kawei na ki sor ha Bangladesh ka la sdang ban mih na ïing ban leit shet jingbam naduh ka 24 tarik mynta u bnai hadien ba ka Sorkar Bangladesh ka la pyllait ïa ka curfew naduh ka por 10 baje mynstep haduh 5 baje janmiet.
Haba ïakren bad ka Kong Sahila Pohtam kaba dei ka samla Khasi kaba sah ha Bangladesh, ka la ïathuh ba ka jingïakhih ha Bangladesh ka la kham jai-jai hadien ba ki samla pule ki la sangeh shipor na ka jingïakhih namar ka jingïap bun briew palat.
Ka la ïathuh ba mar shu pyllait ïa ka curfew ki paidbah ki la mih na ïing ban leit ïew leit hat bad leit trei leit ktah.
Nalor nangta, ka la ïathuh ba ki trai jong ka kompani kaba don ha Dhaka ki la phah ïa ka ban leit shet jingbam ha restaurant hadien ba la plie ïa ka ïew ka hat namar bun ki nongtrei kim pat nud ban wan trei.
Haba kylli la ki dang don ne em ki Khasi kiba pule doktor kiba dang sahkut ha Sylhet? Ka la ïathuh ba kam don jingtip shuh namar haduh mynta ka Sorkar Bangladesh ka dang khang ïa ka internet bad ka network mobile phone.
Na ka liang U Nongsaiñ Hima u la ïoh ban buddien ïa ka Kong Sahila lyngba ka jingïakren da ka ‘Whatsapp’ namar ka ïoh ban pyndonkam da ka ‘wifi’ haba ka don ha restaurant.
Nangta shuh shuh ka la ïathuh ba wat la ki Khasi ki bun kiba sah ha Bangladesh hynrei ki imsuk imsaiñ kim don kano-kano ka jingshah pyndik wat la kane ka jingïakhih ka jur bha ha Bangladesh.
Kum ban shu pynkynmaw ki samla pule na Meghalaya ki la ïoh ban wanphai noh na Bangladesh namar ka jingïakhih kaba jur ha kane ka ri tang namar ka jingdawa ban pynduhnoh ïa ka jingbhah kam sorkar sha ki bahaïing jong kiba ïaleh laitluid ha Bangladesh.