Shillong, Naitung 25
U Dhiraj Bommadevara u la wan ha ka kyrdan kaba saw, u Tarundeep Rai ha ka kyrdan kaba 14 bad u Pravin Jadhav ha ka kyrdan kaba 39 ha ka jingïakop siat khnam jong ki shynrang ha kaba ka India ka la wan ha ka kyrdan kaba lai ha ka thup jong ki kynhun ha ka Paris Olympics 2024.
Shwa ïa kane, ka India ka la ïoh rung da kaba suk ha ka liang ka kynhun ki ‘thei ïalehkai siatkhnam da kaba ka la wan ha ka kyrdan kaba saw jong ka ‘ranking round’. Ka Ankita Bhakat ka la wan ha ka kyrdan kaba 11 da kaba kamai 666 poiñ (ka samoi kaba bha tam ïa ka), ka Bhajan Kaur ka la wan ha ka kyrdan kaba 22 da kamai 659 poiñ, katba ka Deepika Kumari ka la wan ha ka kyrdan kaba 23 da ka 658 poiñ.
Ka jingplie ïa kane ka Paris Olympics Opening kan sdang naduh ka por 11 baje mynmiet jong ka sngi Thohdieng.
Ka jingïakhun jong ka India ha ka jingïalehkai Olympic ha Paris 2024 ka la sdang mynta ka sngi da kaba bun ki nongsiat khnam ki la ïashim bynta ha ki jingïakhun ba para marwei jong ki kynthei bad shynrang. Ka Ankita Bhakat, ka Bhajan Kaur bad ka Deepika Kumari ki la ïoh ban khur ïa ka kyrdan kaba 11, 22 bad 23 na ka bynta ki jingïakhun ba para marwei ha kane ka lympung bad ka kynhun jong ki kynthei ka la jam sha ka quarter final.
Kumba ka paw ka India kam pat ju lah ban khur takma ha ka Olympic na ka jingïalehkai siatkhnam.
