Shillong, Naitung 25
Ki dkhot jong ka State Bharatiya Janata Party (BJP) ki la pdiang burom ïa u Anil K. Antony, uba na ka liang ki khlieh nongïalam ka seng ki la bynshet ha u ban peit ïa ka kynhun hapoh ka jylla Meghalaya.
Ïa u Antony la pdiang burom ha Shillong da u President ka BJP ka jylla, u Rikman G Momin ha ryngkat ka jingïadonlang ki nongkitkam bad ki dkhot ka BJP kaba la long ha ka shlem treikam jong ka seng.
U Antony uba dei ruh u National Secretary bad u nongaiktien jong ka seng BJP mynta un sa peit ïa ki kam jong ka seng hapoh kane ka jylla Meghalaya.
“Ka bor samla jong u bad ka jingshemphang kaba khraw jong u President ba mynta u Rikman G Momin, haba la pynïasoh lang, ka kular ïa ka lawei kaba phyrnai na ka bynta ka seng ha ka jylla”, la ong ka seng ha ka jingpynbna ba la pyllait da ka seng.
U Antony u la ïaroh ïa ka jingshlur, ka jingshitrhem bad ka jingtrei shitom kaba mih na ki nongkitkam ka BJP jong ka jylla Meghalaya, da kaba ong ba kane ka mynsiem trei shitom jong ki nongkitkamka BJP hapoh ka jylla Meghalaya ka long kum ka jingai mynsiem ïa baroh bad ka dak ba ka seng ka la pynkhreh ban kiew sha ki kyrdan kiba thymmai ha ka jylla, la bynrap shuh shuh ka jingpynbna na ka seng.
