Shillong, Naitung 25
Ha ka step jong ka Sngi Palei, ki runar bym lah ban tip ki dei kiei ki la leit ban kawang petrol bom ïa kawei ka ïing kaba don ha ka shnong Mawbah (Jhalupara) kaba la shong wai da ki bar jylla.
Katkum ka khubor la ong ba kane ka jingjia shah kawang petrol bom ka la jia ha ka por hapdeng 7.30 ne 8 duna eiei mynstep, hynrei ym shym la don kiba mynsaw wat la ka la don ka jingbthei jong u petrol bom.
Kane ka ïing kaba la shah kawang petrol bom ka dei jong ka Kong Julie Lyngdoh. Ka dei ruh ka ïing kaba la shong bad sah wai da ki bar jylla. La ong ba ki runar ki la wan na ka bynta ba long khlaw kaba don shadien jong katei ka ïing bad ban kawang ïa u petrol bom uba la leit ban dei shwa ha ka ‘Dish TV’ kaba la pyndait bad hap pat sha madan.
Na ka liang ki briew basah wai ha kane ka ïing, ki la pyntip wat la kam shym la don kano-kano ka jingmynsaw hynrei mynta ki don hapdeng ka jingsyier mynsiem na kane ka jingjia.
Halor kane ka jingjia, na ka liang u Superintendent of Police ka East Khasi Hills u Bah Sylvester Nongtnger u la ïathuh ba ki runar ha kaba nyngkong ki la kawang shwa da ki maw shwa ban kawang pat da u petrol bom.
Shuh shuh na ka liang jong u SP u la pyntip ba ki pulit ki la dep ban pynrung mukotduma ïa kane ka jingjia, bad ka jingtohkit halor kane ka la ïaid shakhmat.
