Shillong, Naitung 25
U Myntri Rangbah ka Jylla Meghalaya u Conrad K Sangma ha ka Sngi Palei haba plie paidbah ïa ka ïing kaba dang shna thymmai jong ka Betasing C&RD Block kaba don ha South West Garo Hills, u la pynpaw ba ka jingthmu ka long ban kyntiew ïa ki jingtei bad pynthikna ka jingshakri sha ki paidbah ka thaiñ nongkyndong.
Ha kane ka sngi plie ïa ka ïing shlem treikam bathymmai, nalor u Myntri Rangbah la ïadon lang u Myntri ka tnat C&RD u Abu Taher Mondal, u MLA Sanjay A Sangma, u Ian Botham K Sangma, u Subir Marak bad kiwei kiwei ki ophisar.
Haba ai jingkren ha kane ka sngi, u Myntri Rangbah u la pyntip ba ka Sorkar ka la kynshew pisa bha ha ki jingtei ha ki jaka nongkyndong, bad haduh T.120 klur tyngka la mang na ka bynta ban shna ïa ki shlem treikam jong ki block thymmai bad bynrap ruh da kaba ong ba haduh 60 na ka 100 na kine ki shlem treikam Block thymmai yn sa pyndep bad plie noh mynta u snem.
U Conrad u la ong ba ka Sorkar ka don ïa ka jingangnud ban kyntiew ïa ki jingtei ha ki nongkyndong khnang ban pynthikna ba ki jingshakri paidbah kin poi bha sha ki paidbah.
“Kum ka sorkar, ngi la kut jingmut ban pynbha ïa ki jingtei jong ngi ha nongkyndong ban pynbeit ryntih ïa ka jingshakri paidbah. Da kane ka jingthmu, ngi shna thymmai ïa ki block ophis, pynthymmai bad shna ïa ki Primary Health Centre (PHC) bad Community Health Centre (CHC), bad kyntiew kyrdan ïa ki Government Lower Primary School ha kylleng ka jylla,” la ong u Conrad.
Shuh shuh u la ong, ban pynjanai ïa ka jingtreikam bad ka jinglah ban ïoh ïa ki block ophis, ba u la dep ban bthah ïa u Deputy Commissioner ka South West Garo Hills ban aiti ïa ki jingtyrwa na ka bynta ban pynbha shuh shuh ïa ki jingtei.
“Ngi kwah ban pynthikna ba haba ki briew ki wan jngoh sha ki block ophis kin ïoh ïa ka jaka kaba suk ban shong ban ap. Ka jingmut baroh kawei ka long ba ki briew ki dei ban ïoh ïa ka jingshakri kaba bha khlem da ïakynduh jingeh eiei. Ka jingpyrshang jong ngi ka long ban shakri ïa ki paidbah,” u la ong.
