Shillong, Naitung 25
Ka Kharang SC ka la ïoh jingjop ha kaba sdang ïa ka lympung ïalehkai SRGT Third Division Football League Tournament 2024 ba la pynïaid da ka Shillong Sports Association, hadien ba la lah ban pynliem noh ïa ka Nongumlong SC da 2-0 kol ha ka Sngi Palei ha SSA Stadium kaba ha First Ground, Polo.
Kane ka nam jop ka la wan urlong lyngba u Jospal Kurbah uba la thep ar kol na ka bynta ban pynlong ïa kane ka kynhun ban ïoh ïa ki lai point kiba nyngkong eh na ka Group-A.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei ka Kharang ka la ïoh ban pynkhih jar nyngkong eh lyngba u Jospal Kurbah ha ka minit ka 11. Une u rangïalehkai shakhmat u la pynbud biang ïa ka kol kaba ar ha ka minit kaba 50. Haduh kaba kut ka Nongumlong kam shym la lah ban pynphai bad ka la mad ïa ka jingshah rem.Ka jingïalehkai ha ka sngi Thohdieng kan long hapdeng ka Lapalang SC pyrshah ïa ka Nongmynsong SC ha ka por 4 baje janmiet.
