Shillong, Naitung 25
Ha kawei ka jingjia, ki pulit ka jylla, lyngba ka ‘Website’ jong ki, ki la pyntip ba u State Informatics Officer/Head Officer, National Informatics Centre (NIC), Shillong, u la ujor ba ha ka 19 tarik Naitung, 2024 ha ka por mynsngi, ki runar ki la tuh ïa shibun tylli ki RAM (Random Access Memory) na ki kor kompiwtor kiba don ha ka shlem treikam jong ka NIC ha kane ka nongbah.
Ha kawei pat ka jingjia, u Hamebanjop Lyngkhoi u la ujor ba ha ka miet jong ka 22 bad 23 tarik Naitung, ki runar ki la tuh ïa uwei u DG Battery ba shongdor T. 22,000 bad ka umphniang Diesel ba shongdor kumba T. 13,000 na uwei u Mobile Tower ba don ha Mawngap.
Nalorkata, ki pulit la ong ba u Pravakar Hajong u la ujor ba ha ka 22 tarik Naitung ha ka por kumba 9 baje mynstep, u nongap pahara ka Zakabari Higher Secondary School, West Garo Hills, u la ong ba artylli ki Solar Battery ba shongdor T. 36,000 ki la jah na kane ka skul.
