Shillong, Naitung:
Ka Food Safety and Drug Administration jong ka jylla Meghalaya, ka National Association of Street Vendors of India (NASVI) bad ka Nestle India ha ka 24 tarik u bnai Naitung 2024, ki la pynbna ba kin sa ai jinghikai ïa palat 500 ngut ki nongdie jingdie harud surok hapoh ka Project Serve Safe Food ha East Khasi Hills.
Ha ka jingpynbna ba la phah sha ki lad pathai khubor la ong ba kane kan pynlong ïa ka jingkheiñ baroh ha ka jylla baroh kawei sha palat 1,500 ngut.
“Naduh ba sdang ïa ka ha u snem 2016, ka Project Serve Safe Food ka la ai jingmyntoi ïa palat 68,500 ngut ki nongdie jingbam ha surok ha kylleng ki 26 tylli ki jylla bad 4 tylli ki Union territory da kaba wanrah lang ïa ki nongshim bynta bapher bapher ban thaw ïa ka prokram ai jinghikai kaba bniah,” la bynrap shuh shuh ka jingpynbna.
Ka Deputy Commissioner, East Khasi Hills District, Kong R.M Kurbah ka la ong, “Kane ka sienjam ka la ïarap ïa palat 1000 ngut ki nongdie jingdie ha surok ha kine ki khyndiat snem ba la dep bad nga ngeit skhem ba kan nang pynkhlain shuh shuh ïa ki ha ki por ban wan.”
U Sanjay Khajuria kum Director jong ki kam treikam bad ka jingpynneh jingpynsah ha ka Nestle India u la ong, “Ka Project Serve Safe Food ka pynpaw ïa ka jingkular jong ngi ban pynbha ïa ka jinglong jingman jong ka jingbam da kaba ïaid shabar jong ka jingbha bad jingshngaiñ jong ki marbam jong ngi hi. Ka projek ka la trei ban pynkup bor ïqa ki nongdie marbam ha surok da kaba pynkiew ïaa ka jingtbit jong ki lyngba ki jinghikai kiba ïadei bad ka jingkhuid jingsuba bad ki rukom sumar. Ngi ngeit skhem ba ngin dang ïai bteng ban ïatreilang bad ki paralok jong ngi bad ban wanrah ïa ka jingktah kaba bha ha ka imlang sahlang.”
Ka Nestle India ka la sdang ïa kane ka kam ha u snem 2016 bad ka la ai jinghikai ïa ki nongdie jingdie harud surok ha Assam, Andhra Pradesh, Arunachal Pradesh, Andaman bad Nicobar Islands, Bihar, Chhattisgarh, Delhi, Goa, Gujarat, Haryana, Himachal Pradesh, Jammu and Kashmir, Karnataka, Jharkhataka, Ka Kerala, Madhya Pradesh, Maharashtra, Manipur, Meghalaya, Nagaland, Odisha, Puducherry, Punjab, Rajasthan, Sikkim, Tamil Nadu, Telangana, Tripura, Uttar Pradesh bad Uttarakhand.
