Jowai, Naitung 26
Ka Riatsaliya Mihmyntdu, Luti tuber Ïalong bad ka Ardamihki Demthring ki la ïoh jingjop, katba ka Dongnein Sohmynting bad Lumchyrmang Mihmyntdu ki la ïakhaid ha ka lympung ïalehkai 4th Adelbert Laloo Memorial Trophy-3rd Division Tournament ha ka sngi Thohdieng ha Kiang Nangbah Stadium, Jowai.
Ha kane ka lympung ïalehkai ba la pynïaid da ka West Jaiñtia District Sports Association (WJDSA), ka Riatsaliya Mihmyntdu ka la pynliem ïa ka Da I hi Mynsngat da 2-0 kol. Ïa kine ki kol jong ka Riatsaliya Mihmyntdu la thep da u Ïohhi Chyrmang tang ha ka minit kaba 3 bad u Ishanroy Pde ha ka minit kaba 70.
Ha ka jingïalehkai kaba bud hapdeng ka Dongnein Sohmynting bad ka Lumchyrmang Mihmyntdu ki la kut ha ka jingïakhaid khlem da lah ban pynkhih jar.
Ha kawei pat ka jingïakhun, ka Luti Tuber Ïalong ka la pynliem noh ïa ka Lumsliarsliar da 2-0 kol. Ïa kine ki kol la thep da u Fredrick Dhar ha ka minit kaba 15 bad u Dangait Pale ha ka minit kaba 34.
Ha ka jingïakhun kaba khatduh jong kane ka sngi, ka Ardamihki Demthring ka la pynliem ïa ka SC SC Nonglatem da 2-0 kol. Ïa kine la thep da u Heisadaemitre Ryngkhlem ha ka minit kaba 16 bad u Lodestar Talang ha ka minit kaba 70+3.
