Jowai, Naitung:
Kum ka jingsngewnguh ïa ka sorkar na ka bynta ka jingithuh ïa ka kolej hapoh ka People’s College lane ka kolej ka ban ïoh jingkyrshan na ka sorkar Jylla, ka Thomas Jones Synod Collage, Jowai ha ka 25 tarik Naitung ka la pynlong da ka jingïalang kaba kyrpang ha phyllaw ka kolej ha ka jingdonlang u Myntri ka tnat pule puthi ka sorkar Jylla u Rakkam A Sangma.
Nalor u Myntri la donlang ruh u MLA ka Jowai u Bah Wailadmiki Shylla, u nongaibuit ka tnat pule puthi ka Sorkar Jylla u Bah HM Shangpliang, u MDC ka JHADC Bah Octomewot Lamin, u Deputy Commissioner ka West Jaiñtia Hills District u Bah BS Sohliya, ka District School Education Officer (DSEO) Kong A Syiem, ki nonghikai bad ki samla pule.
Ha kane jingïalang u Myntri u la sam ruh ïa ki appointment letter sha 23 ngut ki nonghikai jong kane ka kolej bad kawei ka Librarian bad pynkup burom ruh ïa 6 ngut ki nonghikai kiba la pyndep ïa ka jingpule Ph.D kiba kynthup ïa u Dr. Lincoln Dkhar bad Dr. Tyrchain Mitre Lipon na ka tnat Chemistry, u Dr. Kermi U Tariang bad Dr. Armanki Shylla na ka tnat Zoology, u Dr. Bobbyland Lyngkhoi na ka tnat Physics bad Marlon Brando Rani na ka tnat Botany.
U Rakkam A Sangma haba jingkren u la ong, ka Sorkar Jylla ka buh thong ban kyntiew ïa ka pule puthi hapoh ka jylla bad ha ki san snem kiba la dep ka la mynjur ïa ka jingai jingïarap na ka bynta 21 tylli ki kolej na kylleng ka jylla hapoh jong ka People’s College.
Kam long kaba suk ïa ka sorkar khamtam hadien ka jingwan jong ka polisi thymmai, kham bun ki jingeh la mad da ki jaka pule hynrei watla katta ka sorkar ba ïalam da u Myntri Rangbah ka la ai jingkyrshan ïa ki 21 tylli ki kolej ha kylleng ka jylla, la ong u Myntri.
“Wat la ka sorkar ka mynjur tang 24 tylli ki post na bynta ka Thomas Jones Synod Collage, hynrei ngan pynthikna ïa phi ba ka sorkar kan don beit ryngkat bad phi bad nga kyntu ïa phi ba phin nym pynïakhlad ïalade na ka sorkar, bad khlem da kheiñ ïa ka tulop kaba phi shim to ai ka jingshakri kaba bha tam na kaei kaba phi don,” la kyntu u Rakkam ïa ki nonghikai.
Haba bteng shuh shuh ïa ka jingkren, u Rakkam A Sangma u la ong, kawei pa kawei ka jylla ka kwah ban pynwandur ïa ka pule puthi katba lah, khnang ban khring ïa ki samla bad ba kin neh ban pule hapoh ka jylla. Kumta ruh ka dei ka jingangnud jong ka sorkar ba ka Jylla Meghalaya kan long napdeng ki jaka pule ba hakhlieh duh hapoh ka ri. Kumta u la kyntu ïa ki samla pule ban ïai bteng ban ai kaba bha tam katba ki dang don hapdeng ki jingpule.
Shuh shuh u la ong, ki kmie ki kpa ki sngewkmen ban phah ïa ki khun sha ki jaka pule kiba bha, bad ki sngewkmen tam haba ki khun ki wan phai da ka jingjop. Kumta ka long kaba donkam ïa ki samla pule ban pynlong ïa ki kmie ki kpa kiba phuh samrkhie.
Ïa kane ka kolej la pynsah nam ha ka kyrteng jong u Kpa ki dak thoh Khasi u Rev. Thomas Jones bad ka long ka bym hok khlem da kynmaw ïa ka jingnoh synñiang jong ki mishonari bar ri bad dei lyngba jong ki, ba la long kumba long mynta bad u la pynkynmaw ruh ïa ki lai tylli ki jingnoh synñiang jong ki, kata ka ban ïalap ïa ka ktien U Blei, ka pule puthi bad koit ka khiah, la ong u Rakkam.
U Bah Wailadmiki Shylla ha ka jingkren u la ong, ka jingpynbna jong ka sorkar ïa ka Thomas Jones Synod Collage hapoh ka Peoples College, kiba bun ki briew ki ong ba kane kan long kawei na ki jingkular lamler, hooid ka shimpor ïa ka sorkar hynrei ka la pyndep ïa kaei kaba kala kular bad mynta ka sngi la sakhi ïa kata.
U Bah HM Shangpliang u la ong, kane ka dei u mawjam ban rah shakhmat ïa ka kyrdan jong ka pule puthi hapoh ka jylla bad ruh u mawjam ïa ki nongïalam ka Governing Body bad ïa ki nonghikai ban ai ïa ka jingshakri kaba bha tam sha ki samla pule.
Nalorkata, u la pyrto ruh ïa u Myntri ka tnat pule puthi uba la shimkhia shibun ban ïohi ba baroh ki kolej kiba la pynbna kum ki kolej paidbah ki dei ban ïoh ïa ki jingmyntoi.
Ha kajuh ka por u la kyntu ïa kiwei ki nonghikai ki bym shym la hap hapoh ka Peoples College Grant In Aid ba kim dei ban khuslai namar ka jingkhang jong ka sorkar ka plie na ka bynta jong ki ruh.
Ïa ka jingïalang la pynïaid da u Chairman ka Governing Body u Rev. Meshak Shylla bad la ïoh ka jingkren na u Bah WEH Lamin, ka Principal jong ka kolej ka Dr. I Dkhar, u Moderator KJP Synod Mihngi Rev. CL Laloo, ka Kong A Thma Assistant Professor nalor kiwei kiwei.
