Hapoh mynta u bnai yn shah ban ïaid ki kali baroh arliang ha jingkieng dam Umïam

Shillong, Naitung 26

U Myntri ka tnat Bording u A.T Mondal u la leit khmih biang dalade ïa ki kam maramot ïa ka jingkieng ha dam Umïam bad u la lap ba ki kam ki la jan dep lut baroh lait noh sa tang katto-katne kiba dang sah bad u kyrmen ba ïa ka jingkieng yn pyllait noh ban ïaid ki kali kiba wan mar pyrshah na baroh arliang jong ka jingkieng hapoh jong une u bnai Naitung.

U Mondal u la leit khmih bad u Commissioner and Secretary ka tnat bording, u Sanjay Goyal uba dei ruh u Chairman-cum-Managing Director ka Meghalaya Energy Corporation Limited (MeECL), nalor u Bah Bloomingstar Wahlang, Director Generation ka MePGCL bad kiwei kiwei ki ophisar ka MeECL bad ki briew ka kompani ITD Cementation. 

Ki kam ban maramot ïa ka jingkieng dam Umïam bad jingksam thliew ban theh dewbilat thymmai ïa ka jaka ba den ïa ka pung Umïam ka la sdang naduh ka shiteng miet jong ka 14 tarik Nohprah, 2023.

U Mondal u la ong ba u kyrmen ba yn sa pyllait noh ban ïaid ki kali na baroh arliang jong ka jingkieng hapoh jong une u bnai Naitung bad kiwei kiwei ki kam kiba dang sah yn pyntrei khlem da shah pynwit namar ka jingïaid ki kali lyngba kane ka jingkieng.

Shuh shuh u Myntri u la pyntip ba ha ka Lah Sngi U Blei ka 29 tarik Naitung, 2024 kan don jingïakynduh jong ka High Power Committee ban shim rai ha kaba ki riewshemphang na IIT Guwahati, DGP, PWD, bad ki bor district na East Khasi Hills district bad Ri Bhoi district.

U Mondal u la ong ba ki kam ban maramot ïa ka jaka den ïa ka pung Umïam la pyntrei lyngba ka Dam Rehabilitation & Improvement Projects (DRIP).