Shillong, Naitung 26
Ka Hynñiewtrep National Youth Front (HNYF) hapoh ka jingïalam jong u President ka HNYF East Khasi Hills District, u Bah Steve Raymond Khyriem ha ka step jong ka 26 tarik u bnai Naitung 2024, ka la leit ban hiar kynsan sha ka jingkieng ha Umtyngar ban bat hi dalade ïa ki kali kamai Tourist kiba wan na Assam bad ban ym shah satia ba kin leit sha ki jaka jngoh kai kiba don sha ki thaiñ Sohra bad Dawki.
Kane ka jingbat jong ka seng ïa ki kali Tourist ka dei hadien ka jingleh mynthi jong ka sorkar jylla ban pyntreikam noh mardor ïa ka Meghalaya Residents Safety and Security Act (MRSSA) hapoh ka jylla bad ha kajuh ka por ban wanrah ïa ki rukom treikam jong ki kam jngoh kai pyrthei khnang ba ki kali kamai Tourist kiba wan nabar ka jylla kin nym ïoh satia ka lad ban kamai sahuh hapoh kane ka jylla kaba la ktah ïa ka kamai-kajih jong ki nongñiah kali kamai Tourist kiba dei ki paradoh-parasnam.
Hadien kumba katto-katne por ka jingbat bad pynphai jong ka seng ïa ki kali kamai Tourist na ka jingkieng Umtyngar, la wan poi kynsan ki bor pulit kiba don hapoh ka jingïalam jong u Bah Anthony B. Khongsit ha katei ka jaka ban pyllait noh ïa ki kali kamai Tourist baroh kiba shah khanglad ha ka seng.
Na ka liang une u heh pulit mar-mar u la ong ïa ka seng ba ka dei ban pyllait noh mardor ïa kitei ki kali da kaba ong ba ka seng ka dei ban leit ïakren bad ki bor ba halor ym ban shu shim ïa ka bor ha ki kti lajong.
Katba na ka liang ki nongïalam ka seng ha katei ka por ki la pynphai ktien kylla ïa utei u heh pulit da kaba ong ba, “Phi ruh phi dei u Khasi em?”.
Shuh shuh na ka liang ka seng ha katei ka por ka ïakren ruh bad u Bah Pynhunlang Manik Syiem uba dei u Sub-Divisional Police Officer, Sohra, East Khasi Hills uba ong ba kane ka jingleh jong ka seng ïa ki nongwan jngoh kai pyrthei ka ktah ïa ka jakpoh ki nong Sohra baroh bad ong ruh ba lada u Assam u khang ïa ka bam ban wan pynpoi shapoh kane ka jylla, hato ki paidbah ka jylla kin leh kumno namar ki jingkyrshan baroh ki dang wan nabar ka jylla.
Hadien katto-katne por ka jingïapyneh kaba markylliang, na ka liang utei u heh pulit u la kyrpad ïa ka seng ba ka dei ban leit mih shwa sha ki bor ba halor ban ïakren halor kane khnang ba kane kan nym ktah satia ïa kiwei pat ki para Khasi kiba leit shabar ka jylla.
Kham hadien katto-katne por na ka liang ka seng ruh hapdeng ka jingïakren sngewthuh jingmut bad ka tnad pulit ka la pyllait noh ïa kitei ki kali kamai Tourist baroh bad ong ba na ka liang ka seng kan nym shong kli-kti satia hynrei kan ïaid beit shakhmat ban ai da ka jingthoh ban dawa pyntreikam noh ïa ka MRSSA, ban buh ïa ki ‘Entry/Exit Point’ ne ki jaka talasi ban rung bad mih bad ban pyntreikam ruh ïa ki rukom treikam jong ki kam jngoh kai pyrthei khnang ba kan tehlakam ïa ki kali kamai Tourist ban wan kamai sahuh hapoh ka jylla.
Wat hadien ka jingailad jong ka seng ïa kitei ki kali kamai Tourist baroh ba kin ïaid noh hynrei la ïohi pat ba tang hadien katto-katne por eiei, la wan ban syrtap kynsan da ki kynhun pulit ka Special Operation Team (SOT) ha katei ka jaka. Kumta na ka liang ki pulit ki la rah noh ïa baroh ki dkhot ka seng HNYF sha thanat Sadar ban pynlong ïa ka jingtohkit halor kane ka jingleh jong ka seng kaba khlem ïoh bor satia ban leh ïa kane ka kam.
