Shillong, Naitung 26
U MDC ka Sohra konstitwensi, Bah Titosstarwell Chyne u la pynpaw ba ki don ki briew ha thaiñ Sohra ki la sdang ban duh mynsiem haba ki shim da ka ram ban seng kam lajong na bynta ban shna home stay bad hotel haba la shah pyndik ïa ki nongjngohkai pyrthei.
U Bah Titos u la ong ba ki sengbhalang ki don ka hok ban peit pyrman ïa ka jingwan rung kyrthep jong ki bar jylla lada ki wan khlem kot khlem sla hynrei kim dei pat ban pynsangeh shiteng lynti ïa ki nongjngohkai pyrthei haba ki leit sha Sohra.
U la ong ba kane ka aïom ka dei kaba ki nongjngohkai pyrthei kum na kiwei ki jylla bad na Assam ki tuid bha sha Sohra namar ka suiñbneng ka pyngngad.
U la ong biang ki nongjngohkai pyrthei haba ki wan ki ju sah ha ki home stay bad hotel kaba la seng da ki trai shnong hynrei lada shah pyndik ki briew na Sohra kiba kamai jakpoh ki la khuslai khamtam kiba shim da ka ram.
Haba ïadei bad ka jingwan ki kali na Assam u Bah Titos u la ong ban wanrah ïa ka rukom pynïaid thymmai ka shong beit ha ka sorkar ba kan leh kum ha Sikkim ban shim wai da ki kali trai jylla ban ïalam sha ki jaka jngohkai pyrthei hynrei ban pyntreikam jubor khlem da wanrah da ki kyndon jong ka sorkar kan buh jingeh.
Kumta u la kyntu ïa ka sorkar ba kan shimkhia ïa kane ka kam khnang ban nym ktah ïa ka ïoh ka kot hapoh ka jylla.
Ha kawei ka khubor, u Bah Titos uba long ruh u nongïalam jong ka liang pyrshah ha KHADC, u la ong ba ka jingïakynduh jong shiphew tylli ki Autonomous District Council (ADC) ïa u Amit Shah hapoh ka jingïalam u CEM ka KHADC, Bah Pynïaid Sing Syiem sha Delhi ka la long kaba seisoh haba ïakynduh ïa u Amit Shah kum Myntri ka Sorkar India bad ka tnad kam Pohïing.
U la ïathuh ba u Amit Shah u la sngap ïa baroh ki jingai jingmut jong ki ADC na thaiñ Shatei Lam Mihngi bad un sa thaw ïa ka committee ka ban khlieh da u Myntri Khynnah ka Sorkar India ban peit lut baroh ki jingai jingmut jong ki ADC.
“Ngim pat lah ban pynpaw lut ïa ki jingai jingmut jong ngi ha u Amit Shah namar ngi dang buhrieh hynrei ngin sa pyntip ynda ka kam ka la seisoh” u la ong.
U la ïathuh ba ki la ïakren ïa u Amit ba ka Sorkar India kan pynneh-pynsah ïa ki riti-dustur. Kumta u don jingkyrmen ba ka Sorkar India kan wanrah noh ïa ka jingpynbeit thymmai ïa ka 6th Schedule ha ka dorbar ka ban sa long shen.
