![Kurup jingdih pynbuaid ki BSF bad ki pulit ka Tripura kyiad](https://unongsainhima.com/wp-content/uploads/2024/07/kyiad-1-720x386.jpg)
Agartala, Naitung:
Ha kawei ka jingpyntreikam ba la ïasnohktilang da ka tnat shipai Border Security Force (BSF) ha ryngkat ki pulit ka Tripura ha ka sngi Palei, ki la ïoh ban kurup ïa shibun ki song kiba la kot sha ki lak tyngka na ka shnong Barnarayanpur kaba hap hapoh ka Sepahijala distrik.
Kumba la phah jingthoh ki shipai BSF la ong ba ha ka por 7 baje mynstep jong kane ka sngi, haba la ïoh jingtip halor ka jingdon jong ki briew kiba buh ïa ki jingdih pynbuaid, ka kynhun shipai BSF bad ki pulit ka jylla ki la pynlong ïa ka jingleit khynra ha kaba ki la ïoh ban kurup ïa saw tylli ki top ba la thep da u Ganja, kumba la antad uba don 35 kilo kiba don ruh ïa ki dawai Phensydryl Syrup da 3760 bitor na ka ïing jong uwei u briew uba la tip kyrteng kum u Iman Miyan uba long u nongshong shnong jong ka Barnarayanpur, kaba hap hapoh ka Sepahijala distrik.
“Kum ka lad ka kabu na ka jingkawang maw jong ki nongshong shnong, u trai jong kane ka ïing u la lait phet da kaba suk. Ban khanglad ïa ka jingleit kurup bad ka jingpyndep jong ki shipai ïa ka kamram, ki nongshong shnong ki la kawang maw bad kane ka la pynmynsaw ïa u nongñiah kali jong ki shipai BSF ha kaba u la shah sumar ha PHC. Nalor kane, kawei ka kali pulit ka la shah pynjulor. Laba long kumne, ka kynhun shipai ka shem shitom ban tehlakam ïa kum kine ki nongshong shnong kiba leh riewkhlaw”, la bynrap ki shipai BSF.