Shillong, Naitung 26
Ka Meghalaya Public Service Commission (MPSC) ka la ong ba ka jingkynnoh ba ka don ka jied ïa kiba don jingïadei (favouritism) bad ka jingïaid lait na ka rukom pynlong ïa ki eksamin ha ka eksamin MCS ki long ki bym don nongrim ei ei.
Ka MPSC ha u kyrwoh khubor ha ka Sngi Thohdieng ka la ong ba hadien ba la dep ban pynbna bad pyntip ïa ka result jong ka thup sa 62 ngut ki kyrtong kiba pass ban ïakhun ïa ki eksamin MCS (Mains), la kynnoh ba ka Commission ka don ka jingjied bahaïing ne ki briew kiba don jingïadei bad kumta ter ter.
Ka Commission ka kwah ban pynshai ba ka la pynneh ïa ka jingpynlong ïa ka eksamin kaba shai bad kaba khuid ha ka kyrdan kaba ha khlieh duh.
Ka la ong ba ka la shim ïa baroh ki lad ki lynti ban pynthikna ba ki jingkylli ba la buh da u Question Setter/ Examiner kin long kiba lait na ki jingbakla. Hynrei wat hapdeng kine ki jingphikir bad jingshimkhia, ki jingbakla ki ju jia hi hateng-hateng. Kum kine ki ju jia ha kiba bun ki eksamin pynrung kam ba ha khlieh duh jong ka ri.
Ka MPSC ka la pyntip ba hadien ka jingpynbna ïa ka Result jong ka MCS Preliminary Examination, uwei u nongujor u la ai da ka dorkhas sha ka Commission ha ka 25 tarik u Kyllalyngkot 2024 ba pan ïa ka Answer Key na ka bynta katei ka eksamin kaba la kdew bad la ai ïa ka jubab sha u nongmudui ha ka 6 tarik u Rymphang 2024.
Utei u nongujor u la ai ïa ka jingthoh sha ka Commission ha kaba u la ong, ba ka Official Answer Key jong ki 3(lai) tylli ki jingkylli ka long kaba bakla. U la aiti ïa ka dorkhas jong u ryngkat bad ki kot ki sla ha ka 9 tarik u Rymphang, 2024 ban kyrshan ïa ka jingdawa jong u.
“U riewshemphang (expert) hadien ba u la bishar bniah ïa ki jingkylli bad ki jubab, u la mynjur ba ki don ki jingbakla. Ka Commission ka la shimkhia bha ïa kane ka kam bad ka la rai ban kohnguh na ka bynta ban bishar bniah biang ïa ki OMR sheet tang na ka bynta kita ki lai tylli ki jingkylli,” kala ong.
“Lah ban kdew hangne ba: (i) ki 3 (lai) tylli ki jingkylli ki kit 2 (ar) marks kawei kawei, kaba pynlong baroh 6 marks. Lada u/ka ki ïoh ïa baroh lai tylli ki jubab kiba dei u/ka ki ïoh hynriew marks. Ïa ka jingbishar biang la leh tang na ka bynta ki lai tylli ki jingkylli kiba la pyrshah bad ïa ka sla OMR baroh kawei ym shym la bishar biang. Ki Cut Off Marks na ka bynta ki ‘Category’ bapher na ka bynta ka MCS Preliminary Examination kumba la pynbna ha ka 15 tarik u Nohprah 2023 lyngba ka Notification No. OST/SC = 86,” la ong ka khubor.
Ka MPSC ka la ong ba kito kiba ïakhun ïa ka eksamin hadien ba la bishar bniah biang ïa ki 3 tylli ki jingkylli kiba ki marks ki long katkum ka cut-off mark bad shaneng la kheiñ ba ki dei hok bad la pynrung ha ka Additional List. Baroh ki kyrtong kiba la biang bad la pynrung ha ka Additional List ki long 62 ngut.
Ka Commission ka la shimkhia ban pynthikna ïa ka jinglong khuid bad ban leh hok ïa ka jingujor namar ba ka Answer Key ba thikna kala bakla bad la rai ban ailad ïa u bad ïa kiwei pat ki bym shym la ujor.
“Kumba la kdew ha ka jingpynbna, ha ka jaka ban pyllait tang ïa u nongmudui, la pyntreikam ïa ka jingai ïa ka hok kaba ïaryngkat ïa baroh 13,451 ngut ki kyrtong na ka bynta ban bishar biang tang ïa ki 3 (lai) tylli ki jingkylli, ha kaba 62 ngut kiba ïakhun ïa ka eksamin ki la ïoh ïa ka cut-off, nalor ki 580 ngut kiba ïakhun ïa ka eksamin kiba don ha ka thup ba nyngkong, la pynbna ba ki la biang ban ïaleh ïa ka eksamin MCS (Mains).
“Kumta ki jingkynnoh ba ka don ka jingleh shiliang khmat, ka jingshah liang bad ka jingleh lyndet na ka rukom pynlong ïa ki eksamin ki long ki bym don nongrim,” la ong ka MPSC.
