![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Naitung 26
Ka tnad Communication, lyngba ka tnad treikam ne Department of Posts, ka Sorkar India ka la mynjur ïa ka ktien Khasi bad Garo kum ki ktien kiba lah ban jied na bynta ki eksamin ban pynlong da ka tnad.
Kane ka sienjam ka long u mawmer ha ka ban pyntikna ïa ka jingithuh jong ki ktien tynrai ha ka thung kam thung jam jong ka Sorkar Pdeng.
Katei ka rai kaba la pynbna lyngba ka ‘Office Memorandum’ (OM), ka bud hadien ka jingtyrwa na ka liang u Myntri Rangbah ka Jylla, u Conrad K. Sangma. Ha ka 23 tarik Jymmang, 2023, u Sangma u la ai jingmut na bynta ban pynrung ïa ka ktien Khasi bad Garo kum ki ktien tynrai kiba lah ban jied na bynta ka Gramin Dak Sevak lem bad kiwei-kiwei ki kyrdan ha ka tnad Postal ha Meghalaya.
Ïa kane ka jingtyrwa, la phah sha u Myntri ka tnad Information & Broadcasting & Information Technology ka Sorkar Pdeng, u Ashwini Vaishnaw.
Ka OM ha ka 10 tarik Naitung, 2024, ka la wanrah jingkylla haba ïadei bad ki jingdonkam ka ktien na bynta ki eksamin ‘Postal’ ha Meghalaya.
Ïa mynta, la shah ïa ki kyrtong ban jied hapdeng ka ‘Hindi’, ‘English’, Khasi, bad Garo na bynta ki eksamin katkum ka thaiñ jong ki. Kumba ka long, ka Khasi kan don ha ki jaka kum ka East Khasi Hills bad West Jaiñtia Hills, katba ka Garo kan dei na bynta ki thaiñ ba kynthup ïa ka East Garo Hills bad West Garo Hills. Kane ka jingwanrah jingkylla ha ka mat treikam ka thmu ban kyntiew ïa ki lad ki kabu na bynta ki samla trai-ri kumjuh ban shimkhia ïa ki jingkdew ba hashuwa ha kaba ka la don ka jingdonkam tang ïa ka ‘Hindi’ ne ‘English’.