Shillong, Naitung 26
Ka kynhun ki ‘riew paidbah kaba ïadon bynta ha ka ban pynïaid ïa ki kam jngoh kai pyrthei hapoh ka Jylla ka la pynrem jur halor ka jingshah bat ki kali jong ki nongshang kai pyrthei kiba la wan sha ka Jylla da ka jingthmu ban leit sha ki jaka jngoh kai kiba don ha ka thaiñ Sohra bad Dawki ha ki dkhot jong kawei ka kynhun seng ha ka thaiñ Umtyngngar.
“Ngi pynpaw ïa ka jingsngew kyndit kaba khraw bad ka jingsngew-sih halor ka jingjia mynne ka bym poi pyrkhat. Ka jingjia mynne ka long kumba theh umpjah ïa baroh kiba ïatrei ha kane ka kam bad ngi la pynpaw ka jingpyrshah kaba jur haba ïadei bad ka jingleh jong kato ka seng ka la bat ïa ki briew ha shiteng lynti,” la ong u Bah Alan West jong ka Meghalaya Rural Tourism Forum (MRTF) haba kren sha ki nongthoh khubor ha ka Sngi Thohdieng.
Haba pynpaw ka jingsngewsih halor katei ka bynta, u la ong, “Kaba nyngkong eh ka pyni ïa ka jinglong khlemakor halor kane ka jingleh jong ki khamtam kato ka jingjia ka dei ha khyrdop sha Sohra – kaba pawnam na bynta ka jingdon akor, bad ka pyni ïa ka dur ka bym itynnad ym tang jong ka Sohra hynrei ka Jylla baroh kawei sha ka pyrthei shabar.”
U Bah West u la ïathuh ruh ban tei ïa ka ïew ki kam jngoh kai kam dei kaba suk, bad ka shim por da ki snem, ha ryngkat ka jingtrei shitom.
“Kumba ka long mynta hi, nga nud ban ong ba ka dei ka jingtrei shitom jong kito ki briew kiba don bynta ha kane ka kam, la kito kiba seng ïa ki ïing-basa, ba buh dukan ja, kiba ñiah kali, ki ‘Guide’ nalor kiwei-kiwei. Kane ka kam shang kai pyrthei ka ai kam ïa ki trai-ri jong ngi bad ban ïalehkai kumne ka long kaei-kaei kaba sngewsih,” u la ong.
Haba kubur ba ki don ki mat bapher-bapher, utei u nongïalam ka MRTF u la ong ba ki sengbhalang ki don la ka jong ka hok ban rah ïa ki jingpynsngew jong ki hynrei ka don ka rukom ban leh ïa kane.
“Nga kyrpad nangne shakhmat ym tang ïa kato ka seng hynrei ïa kiwei-kiwei ki seng – haba phi leh kum ïa kine ki kam, da pyrkhat sani, pyrkhat jngai ba ka jingktah ruh kan long kaba jngai. Ki briew na ki thaiñ nongkyndong ki la pynpaw ïa ka jingbitar haba ïadei bad kane ka jingjia mynne – ki dei hok ban bitar namar ka la ktah ïa ka jakpoh jong ki,” u la ong.
Na ka liang u Bah West u la pynpaw ruh ka jingsngewkhia ïoh ba katei ka jingjia ka ktah kylla pat ïa ki khun samla kiba pule shabar ka Jylla.
“Na kata ka daw hi nga ïai ban biang ba nangne shakhmat leh da ka jingsngewthuh bad leh da ka jingkitkhlieh naba kaei-kaei kaba jia hangne, ka lah ban kyrtoh kylla sha ki samla pule jong ngi kiba sah shabar Jylla,” u la ong.
Ha kajuh ka por, u President ka Federation of Shillong Hotels (FSH), u Parambir Singh haba pynpaw ba katei ka jingjia ka long kaba pang mynsiem, u la ong, “Ka don ka jingktah kaba jur haba ïadei bad kane…tang mynta ka sngi…30% na ki ‘booking’ la dep pyndam noh bad naduh lashai, ngi khmih lynti palat 50% na ki ‘booking’ ki ban shah pyndam.”
Na ka liang u nongïalam ka Meghalaya Tourism Development Forum (MTDF), Bah Aiban Mawkhroh u la bynrap ba ka kynhun kan sa thoh sha u Myntri ka tnad kam jngoh kai pyrthei, Bah Paul Lyngdoh haba ïadei bad kane ka bynta.
“Ngi panmap halor kane ka jingleh khawpud bad be-aiñ jong ki kynhun seng. Ka Jylla ka dei kaba la kyrkhu da ki jingitynnad mariang bad kawei na ki Jylla kaba don ha ka kyrdan ba hakhlieh duh jong ka ri ha ki kam jngoh kai pyrthei bad ngi pdiang sngewbha biang ïa ki nongshang kai pyrthei sha ka Jylla,” u la ong.
