Shillong, Naitung 26
U Symbud Myntri Rangbah ka Jylla, Bah Prestone Tynsong u la maham tyngeh ïa ki kontraktor bad ki ‘riew shimet kiba khlem bud bad pynkheiñ ïa ki aiñ kiba la don ha jylla na ka bynta ban wan ïalam ïa ki nongtrei bylla kiba nabar ka jylla Meghalaya bad u la kyntait ïa ka jingkynnoh ba ka Sorkar Jylla kam pat pyntreikam ïa ka aiñ Meghalaya Residents Safety and Security Act, 2016.
U Bah Prestone u la kyrpad ïa baroh, khamtam ki kontraktor, ki kompani shimet lane mano-mano ba don bynta ban wanrah ïa ki nongbylla nabar ka Jylla, namar ka Sorkar Jylla kam pyrshah ïa ki, hynrei ka Sorkar ka kwah ba kin bud ïa ka aiñ bad dei ban don ïa ki kot ki sla kiba donkam.
U Bah Prestone u la ong ba lada kito kiba wanrah ïa ki nongtrei bylla kim ïoh ïa ki kot ki sla ka bha ban nym wan namar ka dei jingbym lah jong ki ym ka jingbym lah jong ka Sorkar.
Shuh shuh u Bah Prestone u la bthah ïa ki bor District bad kiba dei ki tnat ba dei khmih ba kin shimkhia ïa ka kam bad pynthikna ba kan don ka jingpyntreikam thikna ïa ki aiñ kiba ïadei bad ka MRSSA, 2016.
U Bah Prestone u la ai jingbthah ïa baroh ki tnat treikam kiba dei khmih la ka dei ka Labour License lane ka MRSSA, ki bor District, ki tnat kiba dei khmih kin hap ban shimkhia bad ka tnat kaba dei ban peit ïa kiba wan trei bylla nabar ka jylla ka dei ka tnat Labour ha kaba la don ruh ki labour inspector ha ki Block.
