Shillong, Naitung 26
Halor ka jingbat bad jingpynsangeh jong ka seng Hynñiewtrep National Youth Front (HNYF) ïa ki kali kamai na Assam ha ka jingkieng Umtyngar kiba thmu ban leit sha ki jaka jngoh kai pyrthei kiba don sha ki thaiñ Sohra bad Dawki, kumta kum ka dak ban pyni sha ka sorkar jylla ba ka seng ka dawa ban pyntreikam noh mardor ïa ka Meghalaya Residents Safety and Security Act (MRSSA), u President ka HNYF East Khasi Hills, u Bah Steve Raymond Khyriem u la ong ba kum ka seng ka kwah ba u Myntri ka tnad ki kam jngoh kai pyrthei ka jylla, u Bah Paul Lyngdoh uba dei khmih halor kane ka bynta u dei ban wanrah da ki kyndon bad ki aiñ kumno ban tehlakam ïa ki kali kamai Tourist kiba wan na kiwei pat ki jylla ban kamai sahuh ha ki jaka jngoh kai pyrthei kiba don hapoh kane ka jylla namar kane ka jingleh jong ki kali kamai Tourist na kiwei ki jylla ka pynïap ïa u trai ri trak muluk uba im ban kamai da kaba kit ïa ki nongwan jngoh kai pyrthei sha ki jaka bapher-bapher kiba don hapoh ka jylla.
Haba kren sha ki lad pathai khubor ha ka 26 tarik u bnai Naitung 2024 ha shwa ba ka seng kan shah rah ha ki bor pulit kiba la wan mih ha katei ka jaka ban khanglad ïa kane ka jingleh jong ka seng, u Bah Steve u la ong ba kane ka jingleh jong ka seng ban khang hi dalade ïa ki kali kamai Tourist ka dei namar ba ka tnad ki kam jong kai pyrthei ka jylla lem bad u Myntri ba dei khmih, u Bah Paul Lyngdoh kim patiaw eiei halor kane ka jingeh ki paradoh-parasnam bad ong ba u Bah Paul Lyngdoh uba dei uwei na ki nongïalam sengbhalang bad uba ieid ïa ka Jaitbynriew mynshwa hynrei mynta pat ynda u la don ha ka shuki u lah kylla khongpong pynban kaba la pyni ba um don shuh ïa ka jingieid Jaitbynriew ne um patiaw shuh ïa ki paradoh-parasnam bad u la ieid ïa ki mynder ri.
“Mynshwa u dei u nongïalam sengbhalang bad uba ieid ïa ka Jaitbynriew hynrei mynta pat ynda u la don ha ka shuki, ngi ïohi ka la kylla khongpong lut bad um ieid Jaitbynriew shuh ne patiaw shuh ïa ngi kum ka Jaitbynriew kaba la pyni ïa ngi kumba u ieid mynder ri namar um pyntreikam ïa kita ki ‘ Tourism Policy’ khamtam kaba ktah ïa ki samla jong ngi kiba kyrduh kam-kyrduh jam”, la ong u Bah Steve.
Shuh shuh u Bah Steve u la ong ba kum u Myntri uba dei khmih halor kane ka bynta u dei ban wanrah ïa ki rukom treikam jong ki kam jngoh kai pyrthei khnang ba kan nym buh jingeh pat ïa ki samla kiba dei ki paradoh-parasnam kiba im ban kamai kali da kaba kit ïa ki nongwan jngoh kai pyrthei shapoh ka jylla Meghalaya.
“Lada ki wan kamai kiba napoh Assam, ki leit shaduh sha Sohra bad sha kiwei-kiwei ki jaka jngoh kai pyrthei kiba don hapoh ka jylla katba ki jong ngi pat kiba don hangne kim don kamai shuh kaba la wanrah jingeh keiñ ïa ngi baroh”, bynrap u Bah Steve.
