Shillong, Naitung 26
Ka jingïakhun ba-ar jong ka Meghalaya Youth League 2024 kan long mynta ka sngi Saitjaiñ ka ban wanrah ïa ka jingïakob kaba thymmai ha ki jaka ïalehkai ba thymmai.
Hadien ka jingsdang ïa kane ka lympung ha ka taïew ba la lah, ïa kine ki jingïalehkai yn pynlong sa ha Resubelpara (Resubelpara Mini Stadium), Jowai (Kiang Nangbah Stadium), Saipung (SBSA Football Ground), Pynursla (UUP Foot-ball Stadium), Tyrsad (Mawlum Tyrsad Playground) bad ha Riangdo (Riangdo Playground).
Ka jingpynlong nyngkong eh ïa ka jingïalehkai U-14 bad U-16 jong ki khynnah shynrang hapoh ka Jylla baroh kawei ba la pynlong da ka Meghalaya Football Association ryngkat ka jingkyrshan lang da ka Sorkar Jylla, la pynlong ïa kane ka jingïalehkai ha la ïing bad shabar (home and away) ha kylleng ki district, ha kaba 20 tylli ki la ïashim bynta ha ka sien kaba nyngkong.
Ka jingthmu kaba don ha lyndet jong kane ka long ban pynlong ïa kane ka lympung kum ka rynsan ban jied ïa ki kynhun samla ki ban ïoh ïa ka lad ban mihkhmat ïa ka Jylla ha ki kyrdan ïalehkai ki ban long ha kylleng jong ka ri India. Kan ïarap ruh ïa ki nongïalehkai phutbol kiba dangrit ban kin jam sha ki klob bapher bapher ha ki kyrdan ïalehkai ba la san (senior) bad ruh ban pynlong ïa ka jylla kum kawei na ki jaka ïalehkai phutbol kaba khlaiñ tam ha ka ri.
