Shillong, Naitung 26
Ka lympung ïalehkai 133rd Indian Oil Durand Cup kan sdang mynta ka sngi Sairtjaiñ ha Viveka-nanda Yuba Bharti Kri-rangan (VYBK) ha kaba ka lahduh jong u snem ba la lah, ka Mohun Bagan Super Giant (MBSG) kan ïakhun pyrshah ïa ka Downtown Heroes kaba na Srinagar ha ka jingïa-khun jong ka Group-A ha ha ka por 6 baje janmiet.
Hadien ka jingïaid lynti da ka kynhun shipai ryngkew bad ki liengsuiñ jong ki shipai bad ka jingïalang jong ka kolshor kaba la pynkhreh bha, yn sdang ïa kane ka jingïa-lehkai ha kaba yn ïadon lang kongsan u Aroop Biswas, uba long u Myntri ka tnad ïalehkai, ka bording bad ka bor ding bad Non-Conventional Energy and Housing jong ka Sorkar West Bengal lem abd kiwei kiba la shah khot sngewbha.
Ka Downtown Heroes FC, ka klob kaba la don mynta kumba saw snem, ka wanrah ïa ka jingïohi thymmai ha kane ka jingïakhun da kaba pynleit jingmut ha kaba pynroi ïa ki samla kiba don ha la ki jong ki sap ïalehkai. Watla ka long kaba lyngkot ha ka jingïaid lynti, pynban ka la mih madan nyngkong eh ha ka IndianOil Durand Cup ha ka samoi ba la dep bad ka la ïashim bynta ha ka I-League Second Division 2022-23.
Ka Mohun Bagan SG ka la rung sha kane ka lympung kum ki nongjop ba mynta, da kaba kiew bha hadien ba ka la rah ïa ka ISL Shield ha ka samoi ba la dep. Hapoh ka jingïalam jong u coach u Jose Francisco Molina, ka la khmih lynti ban khur biang ïa ka jingjop da kaba ka la pynkhlaiñ da kaba wanrah ïa ki rangïalehkai ba pawnam na ka pyrthei kum u Jamie Maclaren, u Greg Stewart, u Alberto Rodriguez, bad u Tom Aldred.
La tip ba ki nongjop kin sdang slem ha ka jingïalehkai jong kane ka samoi bad ka Heroes kan ïalehkai ban wanrah ka jingkylla ha ka rukom ïalehkai. U kapten jong ka, u Basit Ahmed, u la pynpaw ïa ka jingshaniah bad ka jingsarong hashwa ka jingïalehkai haba u la ong, “Ngi la pynkhreh ban pynsngew sarong ïa baroh ki paid nongkyrshan na Kashmir bad kumjuh ruh ïa baroh ki klob ha Kashmir kumba ngi ïashim bynta ha ka Durand Cup mynta u snem. Ban ïashim bynta ha kane ka lympung kaba don nam bad ngi dangtrei shitom bha ban pyni bad ai ïa kaba bha tam.”
Ïa kane la lympung ïalehkai Durand Cup la pynlong ha ka sien kaba nyngkong eh ha ki saw tylli ki jylla ha kaba ka nongbah Shillong bad Jamshedpur ki la rung ha ka thup jong ki nongbah ban pynlong ïa kane ka jingïalehkai mynta u snem ha ka sien kaba nyngkong eh nalor ka Kokrajhar (naduh u snem ba la lah) bad ka Kolkata.
Ïa ki 24 tylli ki kynhun la phiah ha ki hynriew tylli ki group ha kaba ïa ka A, B bad C yn pynlong ha Kolkata, katba ïa ka group-D, E bad F yn pynlong ha Jamshedpur, Kokrajhar bad Shillong. Ki kynhun kiba wan hakhmat eh ha ka kynhun bad ar tylli ki kynhun kiba wan ha ka kyrdan kaba ar kiba paw tam, kin rung sha ka Quarterfinal kaba la buh ban long ha Kokarajhar bad Jamshedpur, nalor ka Kolkata.
Kitei ki 24 tylli ki kynthup lang ïa ki kynhun ïalehkai jong ka Indian Super League (ISL), I-League, ki kynhun ïalehkai jong ki shipai bad ar tylli ki kynhun na ki rib a marjan kum na Napal bad Bangladesh.
