Shillong, Naitung:
Ka KSU Lummawbah Unit ha ka Sngi Balang ka la ïakynduh ïa u Chief Engineer (Roads) ka tnad Public Works Department (PWD) ha shlem treikam ha Lachumiere halor ka jingsniew jong ka surok shnong kaba la buh jingma bad pynshitom ïa kiba bun balang khamtam ïa ki trai shnong bad ki khynnah skul nalor ba ka surok ka long lypa kaba rit.
Ki nongïalam ka KSU Lummawbah Unit kiba la ïakynduh ïa utei u heh ophisar ka tnad PWD ki kynthup ïa u President, samla Hopefulborn L. Mawnai, samla Nangshngaiñbha Lakiang, General Secretary, samla Bansan Kupar Thabah, Publicity Secretary bad samla Shngaiñlang Sohkhlet, President ka KSU Upper Shillong Circle.
Ka seng ka la pynsngew sha u Chief Engineer ban maramot noh kloi bad ban shna ïa ka surok shnong Lummawbah kumjuh ban pynsted ïa ka jingtreikam ban pynbha khnang ba kan wanrah ïa ka jingshngaiñ bad ka jingsuk ha ka leit ka wan jong kiba bun balang.
Ka Seng ka la pan ruh ka jingpynshai na u CE halor ka jingpynslem ban shna pynbha ïa ka surok ha kaba u la jubab ba ka don ka jingpynslem na ka liang jong kawei pat ka tnad kaba don ka jingïatrei lang.
Hadien ka jingïakren kaba lyngkot, u CE u la kular ban shimkhia ïa ka kam bad ban pynsted ha ka ban maramot bad pynbha ïa ka surok shnong Lummawbah.
